Ministri i Brendshëm i Greqisë Johanis Ikonomu, është takuar mesditën e kësaj të premteje me kryebashkiakun e zgjedhur të Himarës, por ende të pa betuar, Fredi Beleri.
Ministri grek i cili vizitoi dtën e djeshme Tiranën në kuadër të ministerialit të Ministrave të Brendshëm të BE dhe Ballkanit Perëndimor, vizitoi Belerin në ambientet e brendshme të burgut të Durrësit.
Në lidhje me vizitën mësohet se nuk do të ketë një prononcim publik nga ministri i Brendshëm grek.
GJKKO vendosi dje të kalojë për gjykim dosjen në ngarkim të Belerit i cili akuzohet për blerje votash.
Ky i fundit ndërkohë ka mohuar akuzat duke u shprehur se është një i burgosur politik i kryeministrit Edi Rama.
Pala greke ka kërkuar betimin e Belerit, duke paralajmëruar Shqipërnë se mbajtja e tij në qeli dhe moslejimi për tu betuar si kryebashkiak do të sjellë pasoja në integrimin e Shqipërisë.
