Deputeti demokrat Oerd Bylykbashi kërkoi mbështetje financiare për shtesat në nevojë gjatë fjalës së tij në parlament, teksa shprehu rezerva për projektligjin për rritjen e pagave të gjyqtarëve të Kushtetueses.
Projektligji i futur për votim në seancën e sotme plenare, është prezantuar nga Ministria e Drejtësisë, me propozim të vetë Gjykatës Kushtetuese dhe parashikon që paga e një gjyqtari kushtetues të jetë rreth 644 mijë lekë, ndërsa e kryetarit të kësaj gjykate rreth 773 mijë lekë.
Gjatë diskutimit të projektligjit në komisionin e ligjeve u ngritën pikëpyetje për diferencën e madhe me pjesën tjetër të gjyqësorit dhe konfliktin e mundshëm të interesit me qeverinë.
Shqetësimet për nismën ligjore, që deputeti demokrat Oerd Bylybashki i ka shprehur dhe në komision, i risolli dhe në seancën e sotme.
Bylybashki tha se paga e 1 gjyqtari me ndryshimet e reja që pritet të votohen këtë të enjte arrin sa 100 pensionistë.
Deputeti e quajti qesharak argumentin e mbrojtësve të projektligjit në komision nga zyrtarët e ministrisë së Drejtësisë. “I është vetëofruar Gjykata Kushtetuese Qeverisë. Qesharak argumenti i qeverisë në mbrojtje të projektligjit se duhet të kenë një pagë dinjitoze”, tha Bylykbashi. “Pse nuk bëjmë përpjekje që t’ia ngremë dinjitetin pensionistëve… Pse nuk e bëjmë më të mirë për pagën minimale”, pyeti deputeti.
Ai u shpreh se vendi sot nuk qeveriset në mënyrë demokratike.
“Nëse do vinte dikush nga Athina antike ku debati ishte duhej demokracia apo oligarkët (oligarkët – jo në atë kuptimin e debatit që bëjmë ne sot, por atë që ishin pak dhe më të mirët). Athina kishte zgjedhur që dilnin qytetarët dhe të merrnin vendime bashkë. Madje gjobiteshin nëse s’dilnin. Nëse kthehet ndonjëri këtu nga ata, thonë këta janë oligarki”, u shpreh ligjvënësi.
Rritje të pensioneve kërkoi dhe deputeti socialist Erion Braçe.
