Lulzim Basha deklaroi këtë të enjte para nisjes së seancës plenare se ai dhe deputetët që e mbështesin do të votojnë projektligjin për rritjen e pagave të gjyqtarëve të Kushtetueses.
“Nuk ka pse ta dyshojë që vota për rritjen e pagave të gjyqësorit është votë për pavarësinë e gjyqësorit. Një gjyqësor i pavarur është një nga mundësitë për ta mbajtur këtë qeveri përgjegjëse dhe para gjyqësorit. Ne nuk bëhemi pjesë e lojërave që hidh gurin dhe fsheh dorën. Sa më i pavarur gjyqësori aq më e suksesshme lufta kundër korrupsionit”, tha Basha në një deklaratë për gazetarët para se të hynte në Kuvend.
Projektligji i Ministrisë së Drejtësisë, i propozuar nga vetë Gjykata Kushtetuese parashikon që paga e një gjyqtari kushtetues të jetë rreth 644 mijë lekë, ndërsa e kryetarit të kësaj gjykate në vlerën rreth 773 mijë lekë.
Gjatë diskutimit të projektligjit në komisionin e ligjeve u ngritën pikëpyetje për diferencën e madhe me pjesën tjetër të gjyqësorit dhe konfliktin e mundshëm të interesit me qeverinë.
