GJKKO ka caktuar masën e sigurisë “arrest me burg” për avokatin Alban Bengasi, i cili u arrestua dy ditë më parë në aeroportin e Rinasit, pasi ishte shpallur në kërkim në kuadër të operacionit të SPAK, “Plumbi i Artë”.
Pas dëshmive të të penduarit të drejtësisë, Nuredin Dumani, avokati Bengasi akuzohet se ka paguar 120 mijë euro për të rrahur dhe vrarë ish-bashkëshorten e tij, Blerta Bengasi, pasi kishte mësuar se e tradhtonte. Gjatë seancës së sotme, Alban bengasi ka mohuar akuzat ndaj tij, teksa ka deklaruar se me ish-bashkëshorten ka marrëdhënie normale, edhe pse janë divorcuar.
“U kanë futur në një rrugë pa krye, u kanë orientuar gabim. Nuk kam lidhje me akuzat. Me bashkëshorten kam marrëdhënie normale pavarësisht se jemi divorcuar. Kërkoj të hetohem pa masë”, ka thënë ai para gjykatës.
Ndonëse ai kërkoi që të hetohet pa masë sigurie, gjykata vendosi që ta lërë në burg. Alban Bengasi vendosi të kthehet nga Dubai, pasi kërkesës së ish-bashkëshoshortes së tij për lehtësim të masës së sigurisë ndaj Alban Bengasit, me të cilin ka dy fëmijë.
Blerta Bengasi, ish-bashkëshortja e avokatit Alban Bengasi, ra pre e një sulmi fizik më 31 Janar të vitit 2020 teksa qëndronte në automjetin e saj. Ajo humbi vetëdijen për të paktën 9 ditë, megjithatë arriti t’i tregojë hetuesve identitetin e autorit duke thënë se ai ishte një person i moshës 28-33 vjeç, rreth 178 cm i gjatë, ezmer, flokë të errët të shkurtër. Më shumë se 3 vite pas kësaj ngjarje, i penduari i drejtësisë Nuredin Dumani u tregoi hetuesve se porositësi i këtij sulmi ishte bashkëshorti i saj, Alban Bengasi me të cilin në atë kohë ajo ishte në proces divorci, i cili kishte paguar 120 mijë euro.
Sipas Dumanit, Bengasi e donte të vdekur bashkëshorten e tij pasi dyshonte se ajo e kishte tradhtuar me shokun e tij të ngushtë. Nuredin Dumani i ka thënë grupit hetimor se personi që e ka kontaktuar fillimisht me avokatin ka qenë Festim Qoli, një nga 9 personat e arrestuar një ditë më parë në kuadër të operacionit “Plumbi i Artë”. Por të gjitha këto pretendime te Dumanit janë kuyndërshtuar nga Bengasi nepermjet avokatit.
