Përfaqësuesja e Gjermanisë po zhvillon fazën përgatitore në prag të dueleve ndaj Japonisë dhe Francës, të cilat mund të rezultojnë decizive në rikthimin e shpesës te tifozët apo rokadën në pankinë.
SKENARI- Prestigjiozja “Bild” ka raportuar ditën e djeshme se roli i Hansi Flikut te “pancerat” varet nga rezultati dhe loja kundër dy takimeve miqësore të mësipërme. Nëse kampionët e 4-fishtë në spektrin e Botërorëve nuk bindin, pas paraqitjeve të dobëta përgjatë muajit qershor, atëherë nuk do të ketë më asnjë justifikim për 58- vjeçarin Hansi Flik. Julian Nagelsman do të marrë vendin e Hansit, gjithmonë nëse Kimish me shokë nuk ia dalin në testet e shtatorit.
FAVORITI- Nagelsman ka të drejtë të negociojë me çdo palë, ndonëse kontrata me Bajernin ende nuk është shkëputur plotësisht. Totenhemi, Çelsi dhe PSG ishin disa nga ekipet që kontaktuan 36-vjeçarin gjerman, por nuk gjetën gjuhën e përbashkët e ku një ndër problemet kryesore ishte kushti i vendosur nga kampi i bavarezëve, pra ku çdo klub që dëshironte të firmoste me Nagelsmanin, fillimisht duhet të shpenzonte të paktën 8-10 mln euro në arkat e rekordmenëve, në formën e një shpërblimi kundrejt pagesës së kryer prej kampionëve në verën e vitit 2021 nga Lajpcigu, plot 256 milionë euro.
KRIZA- U mendua se eliminimi i turpshëm në fazën e grupeve të “Katar 2022” do të sillte efekt te “pancerat” në të gjitha njësitë. Por që rezultoi e tillë vetëm në letër. Edhe pse në gjirin e Gjermanisë gjenden lojtarë me cilësi të jashtëzakonshme si Ter Shtegen në kuadrat, Rydiger e Raum në mbrojtje, për të kaluar te “maestrot” e mesfushës si Gyndoan, Kimish e Musiala.
Leroi Sane, Serzh Gnabri, Tomas Myler dhe Niklas Fylkrug gëzojnë përvojën dhe aftësinë për të goditur rivalin në çdo moment, duke dhënë panoramën e një ekipi që i përmbush të gjitha “kartat” rreth suksesit.
Ama fusha ka dëshmuar tjetër gjë në periudhën e fundit. Në vitin 2023 numëron 3 humbje, 1 barazim dhe vetëm 1 fitore në harkun e 5 aktivizimeve. Më shumë sesa thjesht shqetësues, marrë në konsideratë pritshmëritë e larta të tifozëve dhe federatës vendëse, aq më tepër kur turneu i ardhshëm madhor në rang kombëtaresh, “Euro 2024”, do të zhvillohet pikërisht në shtëpinë e tyre.
