Policia e Skraparit, pas informacioneve të siguruara dhe kontrolleve në terren ka gjetur dhe asgjesuar 980 bimë kanabis sativa në malin e Tomorrit, më konkretisht në fshatin Novaj
Si autorë të dyshuar të kultivimit të këtyre bimëve, janë arrestuar shtetasit, Mariglen Babaliu, 43 vjeç, dhe Dorjan Laze, 33 vjeç, të dy banues në fshatin Novaj, Skrapar. Gjatë kontrollit në banesat e këtyre shtetasve, uniformat blu kanë gjetur dy radio marrëse-dhënëse.
Gjithashtu, raportohet se në vijim të veprimeve procedurale për këtë rast, u referuan materialet në Prokurori ku nisi procedimi në gjendje të lirë, për veprën penale “Shpërdorimi i detyrës”, për shtetasit Sh. L., kryetar i fshatit Novaj dhe Q. D., inspektor i shërbimit pyjor të kësaj zone.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Berat, për veprime të mëtejshme.
