Detaje të reja kanë dalë në dritë nga plagosja me thikë e 68-vjeçarit Zef Paloka, në Shkodër, nga një vajzë e re e cila e akuzon për tentativë përdhunimi.
21-vjeçarja me iniciale, N.N., e goditi disa herë shtetasin Zef Paloka pasi dyshohet se ky i fundit i shkoi në orët e darkës dy ditë më parë afër banesës dhe tentoi që të kryente me të veprime të turpshme.
68-vjeçari u dërgua në spitalin rajonal të Shkodrës teksa ndodhet jashtë rrezikut për jetën, ndërkohë është zbardhur dhe dëshmia e të resë lidhur me ngjarjen.
Ajo deklaroi se prej një viti 68-vjeçari e ngacmonte seksualisht derisa i shkoi afër shtëpisë duke tentuar të kryejë me të marrëdhënie seksuale.
“Prej një viti më ngacmonte në rrugë pasi jemi afër me banesa në të njëjtën lagje. Unë nuk ia kam kthyer asnjëherë. Mbrëmë më erdhi afër banesës dhe filloi sërish të më ngacmojë ndërsa bëri edhe veprime të turpshme përpara meje. E ndodhur në këtë situatë shkova në shtëpi dhe mora një thikë duke e goditur për t’u vetëmbrojtur pasi nuk kisha rrugë tjetër”, mësohet të ketë deklaruar vajza.
Ndërkohë 68-vjeçari Zef Paloka ka mohuar se e ka ngacmuar seksualisht dhe se ka kryer veprime të turpshme përpara saj. Ky i fundit nuk është arrestuar ende nga policia pasi deklarimet e 21-vjeçares për tentativën e përdhunimit nuk janë të vërtetuara. Policia dhe prokuroria e Shkodrës po vijojnë hetimet për të zbardhur të plotë ngjarjen.
