Blerim Bulica, 29-vjeçari i cili së bashku me 4 persona të tjera, goditi një punonjës policie dhe vëllanë e tij, ka dhënë dëshminë e tij në lidhje me ngjarjen.
Sipas burimeve mediatike, ai ka deklaruar ne komisariatin e policisë se me vëllanë e efektivit, kishte konflikt për një borxh dhe njiheshin prej kohësh, teksa të dy janë me origjinë nga Kukësi.
Sipas Policisë, konflikti ka qenë i hershëm, për shkak të një shume parash që nuk i është kthyer.
Ndër të tjera, i riu tha se është takuar disa herë me vëllanë e efektivit të policisë për t’u sqaruar dhe se gjatë kohës që kanë komunikuar së bashku, kanë fyer njëri-tjetrin.
Policia e Tiranës ka arrestuar një prej dhunuesve të efektivit të policisë, shtetasit E. F., dhe të afërmit tij shtetasit B. F., si dhe ka shpallur në kërkim katër autorët e tjerë.
Autoritetet bëjnë me dije se në pranga është vënë shtetasi Blerim Bulica, 29 vjeç, banues në Tiranë, si dhe janë shpallur në kërkim shtetasit Besart Bulica, 35 vjeç, Shaban Bulica, 25 vjeç, Bekim Bulica, 31 vjeç, dhe Benard Aliaj, 34 vjeç.
- Ngjarja e rëndë
Në orët e para të mëngjesit të sotëm, 5 personat i zunë pritë efektivit të policisë në sheshin mes pallateve në rrugën “Besim Alla” në kryeqytet, duke i bllokuar rrugën me automjete me targa angleze, dhe i dhunuan me dru bejsbolli, si dhe ju dëmtuan makinës.
Shkaku i sherrit dyshohet se ka qenë një borxh i pashlyer. Autorët e dhunës i kanë kërkuar një shumë parash të afërmit të efektivit, pasi pretendonin se borxhi dhe konflikti mes tyre ishte i vjetër.
Gjatë kontrollit të ushtruar në banesën e 29-vjeçarit të arrestuar, shërbimet e Policisë, gjetën dhe sekuestruan 3 jelekë antiplumb, veshje kamuflazhi si ato të forcave speciale angleze, dhe një shkop gome si ato të Policisë, dhe sasi lënde e dyshuar narkotike kanabis.
Gjatë sherrit policit i ka rënë pistoleta e cila është gjetur më vonë. Si pasojë e goditjeve që kanë marrë, polici dhe i afërmi i tij i janë dëmtuar dhe ndodhen në spital, jashtë rrezikut për jetën.
