Skënderbeu ka fituar ndeshjen e dytë në po aq të luajtura në startin e këtij kampionati, duke u kthyer pas në kohë në vitet e arta të korçarëve. Pas suksesit ndaj Egnatias pretendente për titull, ka ardhur suksesi edhe në duelin ndaj Dinamos, një tjetër ekipi tek i cili është investuar shumë në këto edicione.
Ashtu si në ndeshjen e parë të kampionatit, edhe sot korçarëve u ka mjaftuar një fitore 1-0, në një duel të interpretuar mirë me kundërsulme që vinin në vështirësi prapavijën e bluve. Goli do të vinte në pjesën e dytë, kur Behiratçe devijoi sferën në portën e tij për t’i dhënë avantazhin korçarëve. Një gol që do diskutohet gjatë pasi kishte një prekje topi me dorë gjatë aksionit, të cilin gjyqtari Jorgji dhe VAR-i e anashkaluan.
Suksesi ngjit Skënderbeun në kuotën e 6 pikëve, ndërsa lë Dinamon me 0 të tilla, duke ia bërë më të vështirë startin në futbollin shqiptar italianit Di Biaxho.
