Kryeministri Edi Rama ka takuar këtë të mërkurë të ngarkuarin me punë të Shteteve të Bashkuara në Tiranë, David Wisner.
Disa ditë më parë, kryeministri Rama shprehu publikisht ‘habinë’ e tij pse i ngarkuari me punë i SHBA-ve në Tiranë nuk kishte shkuar të takonte atë për çështjen e vjedhjes së të dhënave nga sistemi TIMS, por takoi ministrin e Brendshëm dhe e bëri aq të madhe (publike) shqetësimin e Amerikës.
Nuk dihet nëse Rama e ka ‘zgjidhur’ ashtu siç di ai t’i zgjidhë çështjet me të huajt, por nga postimi i ambasadës së SHBA-ve në Facebook tema e vjedhjes së të dhënave nga sistemi TIMS nuk është përmendur më gjatë takimit Wisner-Rama.
Ambasada e SHBA në Tiranë njofton se temë diskutimi ishte partneriteti i ngushtë në Këshillin e Sigurimit të Kombeve të Bashkuara, veçanërisht për Ukrainën, si dhe rëndësinë e mbështetjes së rinisë shqiptare.
“I Ngarkuari me Punë David Wisner u takua sot me Kryeministrin Edi Rama për të pohuar sërish lidhjen e fortë mes Shteteve të Bashkuara dhe Shqipërisë. Ata diskutuan partneritetin e ngushtë të vendeve tona në Këshillin e Sigurimit të Kombeve të Bashkuara, veçanërisht për Ukrainën, si dhe rëndësinë e mbështetjes së rinisë shqiptare. Ëisner falënderoi gjithashtu kryeministrin për mikpritjen e jashtëzakonshme që Shqipëria ka treguar ndaj afganëve”, thuhet në deklaratë.
