Kryeministri Edi Rama mbrojti sërish dje koncesionin e sterilizimit, për të cilin është pas hekurave ish-zv.ministri i Shëndetësisë, Klodian Rrjepaj, biznesmeni Ilir Rrapaj, 6 anëtarë të komisionit të dhënies së koncesionit, ndërsa vijojë hetimet për ish-ministrin Ilir Beqaj.
Rama bëri një vizitë në një nga qendrat ku kryhet sterilizimi te spitali “Shefqet Ndroqi”, duke u shprehur se koncesioni solli “standard krejt të ri sigurie për ndërhyrjet operatore”, ndërsa u rrek të minimizojë faktin se koncesioni i sterilizimit është faktuar nga SPAK një aferë korruptive.
“Hetimi i SPAK-ut për abuzime të mundshme në procesin e ndërtimit të këtij Partneriteti Publik Privat, nuk e cënon aspak suksesin e prekshëm të kësaj nisme madhore të qeverisë shqiptare për Rilindjen e Shëndetësisë, por siguron që askush të mos mbetet i pandëshkuar nëse ia bën me hile shtetit dhe popullit shqiptar, duke nxjerrë përfitime vetjake të paligjshme gjatë kryerjes së detyrës në punën për qëllimin e përbashkët”, u shpreh Rama.
Këtë të mërkurë, kreu i PD-së, Sali Berisha tha se qëndrimi i Ramës fakton se Rama dhe ish-ministri i Shëndetësisë janë pronarët realë të koncesionit.
“Edi Rama provoi dje se ai me Beqjen e tij janë pronarët realë të vjedhjes së dytë të shekullit, sepse ai pas amnistimit të Beqjes nga skapi i partisë, në një akt të pastër kriminal, rendi dje të mbrojë me inskenime dhe dëshmitarë të rremë, dhe statistika false, veprën e tij të rëndë penale, sterilizimin që ju ka kushtuar shqiptarëve gjer sot 79 mln euro dhe që ka rritur me 80 herë çmimin e sterilizimit për njësi në vend dhe e ka bërë këtë proces 4 herë më të kushtueshëm se sa në Gjermani”, tha Berisha në një deklaratë për mediat nga selia blu.
“Kontrata e paligjshme”
Ai shtoi se Rama mori dje publikisht një akt flagrant të hapur presioni ndaj gjykatës, ndërsa kërkoi vazhdimin e kontratës koncesionare.
“Edi Rama dje me sulmin ndaj gjykatës kishte si mesazh të prerë; mjerë ai që guxon të prekë pronën time, për të cilën ai vetë është i aftë të bëjë çdo gjë që ta amnistojë, siç amnistoi ortakun e tij Ilir Beqja. Edi Rama dëshmoi dje se në mbrojtje të biznesit të tij, nuk njeh ligj, kushtetutë, as edhe institucione kushtetuese të vendit siç është Kontrolli i Lartë i Shtetit, institucion që ka denoncuar 2 vite më parë kontratën si korruptive dhe ka kërkuar rinegocimin e plotë të saj”, tha Berisha.
Ish-kryeministri argumentoi pse kontrata koncesionare e sterilizimit është e paligjshme.
“Referuar ligjit të koncesionit dhe prokurimit publik, pasi në këtë rast është bërë ndërthurja e të dyjave, Genc Burazeri ka pasur detyrë ligjore të nënshkruajë dy deklarata. Deklarata e para e konfliktit të interesit se ai nuk është asnjë person të afërt si drejtues në ministrinë e linjës. Deklarata e dytë ka të bëjë me konfliktin e interesit në shoqërinë në fjalë. Në këtë çështje ndahen dy raste. Që ky person nuk ka nënshkruar deklaratën e parë, çka do të sillte anulimin automatik të koncesionit. Rasti i dytë është se ai e ka nënshkruar këtë deklaratë dhe ka mashtruar shtetin, pasi kushëriri i tij ishte ministri i linjës”, tha Berisha.
|Në Kodin e Procedurës Administrative, i cili njëlloj si Kushtetuta dhe ligjet e tjera të vendit, nuk ekziston për Edi Ramën, parashikohet se akti administrativ është i pavlefshëm kur bie në kundërshtim të hapur dhe flagrant me një dispozitë të këtij kodi. Pra, procedura e ndjekur është fiktive dhe antiligjore dhe sjell si pasojë një kontratë të pavlefshme. Vjedhja është e provuar, kostoja është 80 herë më e lartë se ajo në shtet. Në këto kushte, kontrata koncesionare konsiderohet se nuk ekziston pasi është zhvilluar dhe firmosur në kushtet e konfliktit të interesit. Ndaj dhe gjykatësi, me shumë të drejtë ka kërkuar anulimin e kontratës korruptive të sterilizimit”, shtoi.
Kritika lëshoi dhe për SPAK, teksa u shpreh se aministoi Ilir Beqajn, dhe vetvetiu amnistoi edhe kontratën e korrupsionit të Edi Ramës.
