Orikum-Dukat, Palasë-Dhërmi dhe bypass-i i Vlorës janë segmentet e reja rrugore që të çojnë drejt bregdetit të jugut. Mirëpo, përpos premtimeve, inaugurimeve apo inspektimeve në terren të disata ndër vite, këto segmente ende janë në proces pune.
Të treja këto segmente kanë kushtuar mbi 110 milionë euro, ndërsa njëra prej tyre, Orikum-Dukat është me koncension.
Në korrik të vitit 2022, Ministrja e Infrastukturës dhe Energjisë njoftoi hapjen dhe qarkullimin e automjeteve në bypass-in e Vlorës, si një vepër e përfunduar. Ndërsa një javë më pas, në 14 korrik 2022 Kryeministri Edi Rama bëri një tjetër inspektim të këtij segmenti. Sot, një vit pas, bypass-i i Vlorës vijon ende të jetë në punë e sipër.
Autoriteti Rrugor Shqiptar i konfirmoi Citizens Channel në përgjigjen e një kërkese për informacion se punimet në bypass-in e Vlorës nuk kanë përfunduar.
“Kanë mbetur pa përfunduar punimet si më poshtë: Ndërtimi i kryqëzimeve me fshatin e Kaninës në km 9+100 dhe 12+100; përfundimi i shtresave asfaltike; Mbrojtja e skarpateve dhe shpateve nga rënia e gurëve; rehabilitime mjedisor”,-u shpreh ARSH.
Bypass-i i Vlorës është 29 kilometra dhe ka kushtuar 59 milionë euro pa tvsh.
“Rruga Orikum – Dukat, koncensionari shkel afatet e punimeve”
Pak kilometra më tej, këtë sezon u hap për qarkullim rruga Orikum-Dukat. Më 20 korrik të vitit 2023 Kryeministri Rama dhe Ministrja Balluku inspektuan rrugën, ende të papërfunduar.
Ky segment iu dha me koncesion kompanisë “Gjikuria” me vlerën 50.5 milionë euro në nëntor të vitit 2018.
Rruga prej 15 kilometrash, është ndër më të shtrenjtat në Shqipëri, me 3,36 milionë euro për kilometër.
Sipas kontratës koncensionare që zgjat 13 vjet, tri vitet e para kompania “Gjikuria” do të shpenzojë 25% nga fondet e saj për ndërtimin e rrugës dhe më pas fillon shlyerja e pagesës.
Mirëpo, procedurat e ndjekura për rrugën Orikum-Dukat nuk kanë qenë transparente, ndërsa Kontrolli i Lartë i Shtetit ka evidentuar se fondi limit për kontratën e punës mbikëqyrëse tejkalonte limitet, pasi do të kushtonte 100.000 euro për kilometër.
“Vlera e fondit limit e rritur në vlerën 155,695,418 lekë me TVSH është e paargumentuar dhe e pajustifikuar mbi bazat ligjore nga grupi i hartimit të specifikimeve dhe fondit limit, vlerë e cila është përfituar padrejtësisht nga sipërmarrësi i „Shërpbimeve inxhinierike të pavarura për zbatimin e Kontratës koncensionare/PPP në dëm të buxhetit të shtetit“,-thuhet në raportin e KLSH-së.
“Palasë – Dhërmi, 3 vite për 4 kilometra rrugë”
Kompania “Gjikuria” ka marrë përsipër të ndërtojë edhe aksin Palasë-Dhërmi, i cili u hap për qarkullim në gusht të vitit 2022, për t’u ri mbyllur pas përfundimit të sezonit veror. Ndërsa në korrik të vitit 2023 rruga u inspektua sërish nga ministrja Balluku me premtimin e rihapjes “brenda pak ditësh”. Sot, një rrugë e kalueshme, por në punë e sipër.
Tenderi për këtë rrugë u hap në tetor të vitit 2020 nga Autoriteti Rrugor Shqiptar, ndërsa kontrata me kompaninë u lidh më 3 shkurt të vitit 2021.
Sipas Autoritetit Rrugor Shqiptar aksi kryesor i rrugës Palasë-Dhërmi është 4.45 km, ndërsa rrugët sekondare shkojnë në 2.7 km, duke kushtuar në tërësi 2.2 miliardë lek.
Ky segment u tenderua për një afat prej 18 muajsh, e megjithatë, edhe pse kanë kaluar 31 muaj, sërish rruga është në punë e sipër.
Autoriteti Rrugor Shqiptar shprehet se ky segment rrugor do të mbarojë në fund të vitit 2023.
“Punimet e kontratës “Ndërtim rruga Palasë-Dhërmi” jane në proces zbatimi. Kanë mbetur pa përfunduar punimet për shtresën e asfaltobetonit dhe punime në rrugët lidhëse. Ky objekt pritet të përfundojë në fund të vitit 2023”,-saktësoi ARSH-ja.
Ndërsa ministrja Belinda Balluku gjatë inspektimit të dy segmenteve rrugore në 20 korrik të këtij viti u shpreh se Orikum-Dukat dhe Palasë-Dhërmi do të përfundojnë të dyja në qershorin e vitit 2024./ Citizens-channel
