Arroganca e institucioneve dhe pushtetarëve vijon e shfaqet çdo ditë përballë qytetarëve të cilët jo vetëm që nuk marrin zgjidhje për problemet e tyre, por shahen e poshtërohen.
Sjellje kjo që shëmbëllehet që nga drejtuesi më madhor i këtij vendi, kryeministri Edi Rama e deri te pushtetarët e thjeshtë, siç është pasqyruar në media në mënyrë periodike – një realitet i hidhur që qytetarët e prekin në jetën e përditshëm.
Në rolin e cubit, kësaj here është shfaqur drejtori i emergjencave civile Haki Çako.
Në një video të publikuar në media këtë të premte, që raportohet të jetë filmuar në zonën e Beratit, shfaqet një banor i zonës i cili debaton me Çakon. Qytetarit të cilit raportohet se po i digjej ullishta i kërkon Çakos të hapë rrugën, pasi makina e qëndruar të cilën drejtori përdorte, kishte bllokuar lëvizjen e zjarrfikëses.
Haki Çako, ndoshta i frymëzuar nga shefi i madh Edi Rama dhe pa e ditur se po filmohet, i përgjigjet: Mo më ça trapin mua! Legen!
Po sot, në një komunikim për mediat, ai u shfaq i shqetësuar për situatën e zjarreve, ndërsa kritikoi kryebashkiakun e Beraratit Ervin Demo, për të cilin tha se: “nuk hap telefonin, ndërkohë që i digjet gjysma e territorit”.
Të ketë qenë vallë mospërfillja e Demos që ka i ka ngritur nervat Çakos, i cili dufin ka menduar t’ja nxjerrë qytetarit duke e urdhëruar prerë të “mos i çajë trapin”?!
Reagimi i Berishës
Lidhur me rastin ka reaguar kryetari i PD-së, Sali Berisha, i cili shprehet se dënon “me ashpërsinë më të madhe arrogancën ndaj qytetarit”.
Më tej, Berisha poston edhe një denoncim për të cilin thotë se ka shkuar në adresë të tij. Në mesazhin në të cilin denoncuesi thotë se ka qenë ai që ka filmuar videon, shkruhet:
“Arroganca e pushtetit kerkon t’i terheqim zvarre profesor. Shqiperine nuk ua falim. Jam ketu ne fshatin Remanice me banoret qe po u digjen ullinjte. Shqiperine do e ngrejme ne protesta te fuqishme! Degjohet ne video Hakiu kur i thote qytetarit:- Legen! Sekonda e 3-4. Zonja pas Hakiut eshte Valbona, kryetare e PS Berat. E regjistrova vete, tashme sa zbrita nga mali Remanices. Banori me emrin Adriatik Selami me falenderoi per regjistrimin qe i bera dhe me kerkoi vete ta bejme publike. Hakiu me syzet 2 mije euro ju prish terezia e pushimeve dhe ne arrogance te plote fyen me fjalor rruge banorin qe i digjen ullinjte”.
