Arben Ahmetaj do të vijojë të jetë deputet i Kuvendit të Shqipërisë, por institucioni do të ndërpresë çdo marrëdhënie financiare me ish-zv/kryeministrin.
Me vendimin që ka hyrë në fuqi që prej datës 14 Korrik, ditën kur Kuvendi votoi dhënien e lejes Prokurorisë Speciale për të arrestuar ish-zv/kryeministrin Arben Ahmetaj, nën akuzën për korrupsion në çështjen e inceneratorëve, ai nuk do të përfitojë më rrogën mujore të deputetit.
Ahmetaj po ashtu nuk do të arrijë të marrë përfitime financiare, siç janë dietat, shtesa e rrogës për pjesëmarrje në komisionet parlamentare, rimbursimin e karburantit dhe telefonit.
Ligjërisht Ahmetaj ende gëzon mandatin e deputetit dhe për rrjedhojë rregullorja nuk parashikon ndërprejen e pagës. Kushtetuta përcakton se mandati i deputetit mbaron ose është i pavlefshëm, kur ai nuk bën betimin; kur heq dorë nga mandati; kur mbaron mandati i Kuvendit; kur mungon pa arsye mbi 6 muaj rresht në Kuvend apo kur dënohet me vendim gjyqësor të formës së prerë për kryerjen e një krimi.
Por një vendim i tillë është marrë pasi ish-zv/kryeministri zgjodhi t’i shmangej drejtësisë.
Në seancën e 14 Korrikut, Kuvendi miratoi me 117 vota pro të mazhorancës dhe opozitës, asnjë kundër dhe 3 abstenime, autorizimin që SPAK ta arrestojë dhe të kontrollojë banesën e Ahmetajt.
Vendimi i Kuvendit vjen në kushtet kur deputeti Arben Ahmetaj ishte larguar nga Shqipëria pak ditë para se SPAK të merrte lejen zyrtare për ta arrestuar atë.
Arben Ahmetaj është shpallur në kërkim ndërkombëtar, pasi akuzohet për “mosdeklarim, deklarim të rremë dhe fshehje të pasurisë”, vetëm dhe në bashkëpunim, “Korrupsion pasiv të funksionarëve të lartë shtetërorë ose të zgjedhurve vendorë” në gjashtë raste, “Pastrimit të produkteve të veprës penale ose veprimtarisë kriminale”.
Dosja hetimore e SPAK është ngritur mbi veprimet apo mosveprimet e tij që kanë favorizuar biznesmenët Klodian Zoto dhe Mirel Mërtiri për të fituar kontratat për inceneratorët e Fierit, Tiranës dhe Elbasanit.
