Oligarku dhe një ndër klientët kryesorë në sektorin e infrastrukturës për qeverinë Rama, Pëllumb Salillari është shndërruar në “padronin” e tenderave në qarkun e Beratit.
Salillari është denoncuar vazhdimisht si përfituesi i vetëm i parave publike që shkojnë për investime në tre bashkitë kryesore të qarkut, Berat, Kuçovë dhe Dimal.
Ai është përfituesi i tenderit 4 milionë euro të Ministrisë së Mbrojtjes për ndërtimin e murit rrethues të bazës ajrore të NATO-s në Kuçovë, por edhe tenderit 3.61 miliardë lekë të bashkisë së Kuçovës për ndërtimin e një ujësjellësi në Sinec, që rrezikoi ta çonte pas hekurave kryebashkiakun Kreshnik Hajdari.
Firma “Salillari” po ashtu ka fituar tender për ndërtime të akseve rrugore lokale, menaxhon guroret që gërryejnë kodrën mbi qytetin e Dimalit, por duket se një ndër oligarkët e preferuar të Edi Ramës nuk do ndalet me kaq.
Sipas ish-deputeti të Partisë Demokratike, Lefter Maliqi, një tjetër tender i majmë është shtuar në borderon e Salillarit, si shpërblim nga kryeministri Edi Rama për mbështetjen financiare por edhe fizike që ai i dha kandidatëve socialistë për kryebashkiak në zgjedhjet e 14 Majit.
Maliqi ka denoncuar me foto dhe video prezencën e Salillarit në muajin e fushatës elektorale për zgjedhjet e 14 Majit në Kuçovë, ku u investuan mijëra euro në blerje votash për kryebashkiakun Hajdari.
Tashmë sipas tij, dhuratë për Pëllumbin e qeverisë Rama është bërë një tender me vlerë 1.3 miliardë lekë, që parashikon shndërrimin e fushës së vjetër të sportit në Berat, në një ambient argëtimi për fëmijë e të rinj.
POSTIMI I MALIQIT:
Ish-fatorinoja, tanimë Oligarku Salillari, shpërblehet nga Qeveria me miliarda lekë tendera, në Qarkun Berat, si ‘Fletë Nderi’, për fushatën e “14 Majit”, me taksat e qytetarëve.
Tender mbi 1 miliardë e 300 milionë, tek ‘Fusha e Vjetër e Sportit’, në Berat, për t’a kthyer ambient argëtimi për të rinjtë, thua se do të ndërtojë anije lundruese!
Ish-fatorinoja i pangopur! Nuk numërohen miliardat tendera, në Kuçovë e Berat, para dhe pas fushates!
I pangopuri ish-fatorinoja, Oligarku Salillari, nuk lë radhë për firmat e tjera të Qarkut Berat, disa prej të cilave janë në prag të falimentimit.
Nuk numërohen dëmet që i ka shkaktuar ‘Zonave të Mbrojtura’ dhe banorëve; dëmton lumenj, male, fusha e pyje; ndërton pa leje dhe se ndalon askush!
Favorizoi ‘pengun’ e tij Hajdarin, në Bashkinë Kuçovë, me ‘çakull e asfalt elektoral’ dhe joshi votuesit, e bëri fushatë hapur duke ndërruar makinat mijëra Euro, herë i maskuar, e herë i fshehur.
Askush nuk e ndal!
As Drejtësia e as Qeveria!
Babëzia i ka errur sytë me paratë e popullit!
Arrinë të blejë çdo gjë; emëron, cakton, vendos, eliminon rival e kundërshtarë! Imagjinoni çfarë dëmi bën ish-fatorinoja!
Skandal!
Shtet mafioz!
Shikoni guroren në Urë-Vajgurore, se çfarë i ka bërë e po i bënë malit, pyllit, banorëve, pa zbritur me poshtë deri në Kuçovë, ç’i ka bërë pyjeve dhe lumenjëve!
Se ndal kush!
Paraja hedh ujin përpjetë! Dhe cilat?! Paratë e popullit!
Skandal!
“SPAK” e “Prokuroritë e Rretheve kanë patur e kanë me dhjetra kallëzime, por disa të pushuara e disa gati për t’u pushuar, disa ende nën hetim, por ‘peshkun e madh’, miliarderin se zë rrjeta!… si Oligark, se si njeri është peshë e lehtë, çdo rrjetë do e zinte.
Por ka Zot dhe Drejtësinë e Zotit, Oligarku, s’ka shanc ta blejë! Vendimi i tij është i formës së prerë.
