Partia Demokratike paralajmëron ankim në Kushtetuese për ligjin e votuar nga socialistët në seancën e fundit parlamentare, që i jep mundësinë kreut aktual të Akademisë së Shkencave Skënder Gjinushi që të kandidojë për një mandat të dytë.
Ligjin që është publikuar tashmë në Fletoren Zyrtare, deputetja demokrate Ina Zhupa e cilëson antikushtetues.
Ajo vë në dukje edhe dakordësinë e kreut të Shtetit Bajram Begaj me nismën e socialistëve.
“Nuk do rrimë të heshtur para shkeljes së ligjit, para pucistëve të Parlamentit dhe uzurpatorëve të Akademisë së Shkencave. Sot kaloi në heshtje nga Presidenti i Republikës, ligji ad personam për Skënder Gjinushin, një ligj që nuk as legjitimitet, as ligjshmëri! Një ligj antikushtetues, i bërë në shkelje të çdo procedure parlamentare edhe në shërbim të interesave personal të një ish politikani si Gjinushi. Në shtator ky ligj do shkoj në Gjykatën Kushtetuese sepse para shkeljes së kushtetutës, ne deputetët përfaqësues të qytetarëve, nuk mund të bëjmë as sy qorr, as vesh shurdhër. Akademia e Shkencave do ti kthehet tempullit të diskurseve shkencore me interes kombëtar dhe do ndaloj shpejt të qënuri një post pune për të mbushur xhepat dhe bërë qoka”, shkruan ajo në një reagim në rrjetet sociale.
