Deputetja demokrate Ina Zhupa ka reaguar ashpër përmes një postimi në rrjetet sociale, lidhur me dyshimet që lindën pas vizitës së kryeministres italiane Giorgia Meloni në rezidencën e kryeministrit Edi Rama në Vlorë.
Siç vetë Rama e ka bërë me dije në intervistën për La Stampa, në pushimet shqiptare të Melonit është diskutuar për ndërtimin e ujësjellësit që do të coonte ujë nga burimet në jugun e Shqipërisë, drejt e në rubinetët e italianëve në rajonin e Puglia-s.
“Ka kaq shumë gjëra që kemi në pritje. Së shpejti, Komiteti Strategjik për Investimet Italiane, i krijuar me Di Maio, do të mblidhet për herë të dytë. Biseduam për projektin e ujësjellësit, të cilin Andreotti dhe Berlusconi e dëshironin tashmë, nga Shqipëria në Puglia. Kjo do të ishte e rëndësishme. Bëhet fjalë për përdorimin e burimeve në Shqipërinë e Jugut për t’i lidhur ato me Italinë”, deklaroi Rama në intervistë.
Sakaq, deputetja Zhupa duke iu referuar një artikulli të Boldneës.al, ku bëhet me dije se burimi që Rama i ka “falur” Melonit është ai i “Syrit të Kaltër”, shprehet se një projekt i tillë do të ishte papërgjegjshmëri totale.
“Dje dhe sot mediat japin lajme në lidhje me vendosjen e tubave tek Syri i Kaltër me qëllim furnizimin me ujë të rajonit të Puglias në Itali. Edhe vizita miqësore e kryeministres Meloni, lidhet me këtë sipas burimeve mediatike. Nuk është hera e parë që dëgjohen të tilla përpjekje me Italinë dhe me Greqinë por do ishte çmenduri, papërgjegjshmëri dhe antiligjore një projekt i tillë me cilindo shtet”, shkruan Zhupa në Facebook.
Duke theksuar se “Syri i Kaltër” nuk është mall për shitje, Zhupa shton se është absurde mënyra si Rama dhuron pasuritë kombëtare dhe bën pazar me to, kur qytete si Saranda e Delvina në jug të vendit, nuk arrijnë të furnizohen me ujë të pijshëm 24 orë.
“Syri i Kaltër është park natyror dhe ka statusin zonë e mbrojtur nga viti 2002. Punimet, tubacionet, ndërhyrjet do ishin kategorisht të ndaluara dhe në dëm të kësaj pasurie natyrore.
Saranda, Delvina, qytetet e tjera vuajnë nga mungesa e ujit të pijshëm por ska shkuar kurrë ndërmend një ndërhyrje me tubacione në Syrin e Kaltër. Aq më pak të mund të mendohet apo pranohet dicka e tillë për shtetet fqinje”, thekson Zhupa.
Më tej ajo thotë se si deputete përfaqësuese edhe e Finiqit, bashkisë ku ndodhet “Syri i Kaltër” do të kërkojë informacion zyrtar në lidhje me planet konkrete që ka qeveria shqiptare për këtë park natyror.
“Asnjë shkatërrim i tij nuk do pranohet kurrsesi!”, këmbëngul deputetja demokrate.
LEXO EDHE:
