Mbrëmjen e kaluar ka patur një “bum” aksidentesh automobilistike në vendin tonë, pasi janë regjistruar pesë aksidente, brenda dy orësh.
Në Fier makina përplasi një këmbësor të moshuar i cili ndërroi jetë. Ndërkohë, edhe në Maliq, makina ka përplasur një 58-vjeçar, i cili ndodhet nën kujdesin e mjekëve.
Në Shkodër një makinë me targa italiane ku udhëtonte një familje shqiptarësh që kishin ardhur me pushime u përplas me një makinë tjetër. Katër persona mes tyre dy fëmijë u lënduan. Ndërkohë në Sarandë motori ku udhëtonin dy turistë 60 vjeçarë u rrëzua afër tunelit në Kardhiq – Delvinë.
Aksidenti në Fier
Rreth orës 22:00, në aksin rrugor “Levan-Tepelenë”, në fshatin Buzëmadh, automjeti tip “Opel” që drejtohej nga shtetasi O. P., ka aksidentuar shtetasin Nazer Mehmetaj, 84 vjeç (këmbësor), i cili ka ndërruar jetë. Drejtuesi i automjetit është shoqëruar në Komisariatin e Policisë për veprime të mëtejshme ndërsa grupi hetimor ndodhet në vendin e ngjarjes dhe vijon veprimet hetimore për zbardhjen e shkakut të aksidentit.
Aksidenti në Korçë
Dy makina janë përplasur me njëra tjetrën në afërsi të fshatit Ciflik. Mjeti tip Porshe që po udhëtonte drejt Korçës u përlas me një makinë që po shkonte në drejtim të Pogradecit. Raportohet për dëme materiale ndërsa fatmirësisht dy shoferët kanë pësuar dëmtime të lehta.
Aksidenti në Maliq
Ndërkohë në aksin rrugor “Korçë-Pogradec”, në afërsi të fshatit Leminot, Maliq, automjeti tip furgon me drejtues shtetasin A. T., ka përplasur këmbësorin Thoma Kolvani, rreth 58 vjeç, i cili u dërgua për ndihmë mjekësore në spitalin e Korçës. Me drejtuesin e automjetit po kryhen veprimet e mëtejshme procedurale.
Aksidenti në Shkodër
Në aksin Shkodër – Kryebushat, në vendin e quajtur Melgushë. Dy automejte u përfshinë në aksident. Si pasojë një mjet tip Audi me targa shqiptare në të cilën po udhëtonin 2 persona u përplas me një mur betony, ndërsa makina tip Opel me targa italiane në të cilën ndodhej një familje emigrantës doli nga rruga duke përfunduar poshtë rrugës nacionale.
Nga të dhënat paraprake mësohet se në spitalin rajonal të Shkodrës janë dërguar 2 personat që ndodheshin në mjetin tip Audi, si dhe dy fëmijë të mitur. Mjekët thanë se të gjithë personat e mbërritur në spital janë jashtë rrezikut për jetën, ndërsa fëmijët kanë pësuar vetëm tronditje.
Aksidenti në Sarandë
Dy turistë, mes tyre një shtetas austriak dhe një gjerman u plagosën pasi motoçikleta me të cilën po udhëtonin doli nga rruga në aksin Kardhiq-Delvinë, në vendin e e quajtur Skërficë
Aksideneti u shënua mbrëmjen e 18 gushtit. Shtetasi gjerman R. B., 69 vjeç, duke drejtuar motoçikletën, 300 metra në dalje nga tuneli për në Sarandë, ka humbur kontrollin mbi drejtimin e motoçikletës dhe për pasojë motoçikleta ka dalë nga rruga. Si pasojë e daljes nga rruga të motoçikletës janë dëmtuar drejtuesi i motoçikletës dhe pasagjeri shtetasi austriak G. G., 60 vjeç, informoi policia e Vlorës.
Të dy shtetasit janë dërguar për ndihmë mjeksore në Spitalin e Sarandës.
