Nga Boldnews.al
Është vetë mjek në profesion, ndonëse mbante gradat e rënda të gjeneralit, deri në ditën kur u thirr që të bëhë fatkeqësisht për shoqërinë shqiptare, “ushtar i kryeministrit”. Pas një viti në presidencë, Bajram Begaj nuk i ka kthyer pas asnjë ligj mazhorancës. Të gjitha i ka dekretuar, sado reagime të kishte nga shoqëria civile dhe grupet e interesit. Edhe dy ligjet më të debatuara të fundit ai për kultivimin e kanabisit mjekësor dhe ligji që i detyron studentët e mjekësisë të punojnë për 5 vjet në Shqipëri, pasi mbarojnë studimet, janë dekretuar në heshtje nga presidenti.
Si mjek “gastrohepatolog”, Begaj e di mirë se “ushqimi më i preferuar” për të në detyrën që ka, është që të mos ia prishë midenë kreut të qeverisë. Edhe këtë radhë me heshtje përshëndeti Ramën që ndodhet me pushime, duke mos ai prishur terezinë as për pak. Si për të treguar se “presidenca është e hapur”, Begaj priti në një takim rreth dy javë më parë një grup studentësh të mjekësisë që shprehën kundërshtinë për këtë ligj që gati është i formës si “pesë vite punë e detyruar”.
I dëgjoi për kortezi, por në mendjen e Begajt kishte vetëm dy mundësi: ose t’i dekretonte menjëherë, ose të zgjidhte një “dekretim në heshtje”. Pas takimit me përfaqësinë e studentëve, zyra e shtypit e Presidencës njoftoi se: “Presidenti siguroi përfaqësuesit e studentëve se do të shqyrtojë me seriozitet të gjitha argumentet e paraqitura prej tyre, si dhe argumentet e relatuara nga ligji para se të veprojë sipas kompetencës dhe procedurës kushtetuese”.
Serioziteti i Begajt u duk pikërisht sot kur dekretoi në heshtje dy ligjet e shumëdebatuara, atë të studentëve që detyrohen të punojnë pesë vite në vend pasi të përfundojnë studimet dhe ligjin për lejimin e kultivimit të kanabisit mjekësor dhe industrial.
Neni 86 i Kushtetutës së Shqipërisë, në pikën 1, thotë shprehimisht se: “Presidenti i Republikës është Kryetar i Shtetit dhe përfaqëson unitetin e popullit”. A është vërtetë Begaj përfaqësues i unitetit të polpullit, jo politik, i paanshëm, apo “noter personal” i kryeministrit që ka dekretuar çdo ligj që i ka ardhur në një vit “punë të dhuruar” në Presidencë? Kjo duket qartësisht edhe me heshtjen e tij, duke kaluar dy ligje që do kenë pasoja për vendin si në fushën e mjekësisë ashtu edhe në lulëzimin e “kanabisit me ligj”.
Më 4 qershor të vitit të kaluar, në votimin e Parlamentit në raundin e katërt dhe të fundit, Bajram Begaj u zgjidh president i vendit me 78 vota. Të gjithë që votuan pro tij ishin deputetët e PS-së dhe të PSD-së së Tom Doshit. Me dorën në zemër dhe dukshëm i përulur Begaj falenderoi Raman dhe që nga ai moment nisi epoka e tij në presidencë e cila në një vit ka prodhur pak më shumë se asgjë. Mbrëmë vonë skadoi afati I dekretimit të dy ligjeve të dyshimta, ndoshta atëorë presidenti mund të ketë qenë në gjumë të thellë, por edhe kur “fle”, mendon si Rama.
