Një megaoperacion ndërkombëtar antidrogë është duke u zhvilluar nga policia shqiptare në bashkëpunim me Guardia di Finanza, DEA amerikane dhe SPAK, ku është goditur një grup kriminal me bazë në Fushë-Kuqe, të Kurbinit.
Mësohet se SPAK ka firmosur 6 urdhër-arreste, ku një prej tyre është edhe për ish-zyrtarin e Policisë, Arlind Ismailuka. Nga 6 të arrestuarit, 4 janë shqiptarë dhe dy ukrainas. Burime bëjnë me dije se ku shkëmbente kanabis me heroinë dhe kokainë.
Gjatë operacionit janë bllokuar 4 gomone. Mësohet se trafikantët i kanë vënë flakën një veliere kur janë afruar forcat e policisë, në të cilën kanë qenë dhe pakot me drogë.
Gomonet me të cilët trafikantët do të bënin shkëmbimin e drogës në det, janë nisur rreth orës 19:00 të pasdites nga Patoku. Veliera ishte me flamur ukrainas, nisur nga Mali i Zi. Droga do shkëmbehej në Adriatik, 18 milje nga laguna Patokut.
Burime bëjnë me dije se uniformat blu kanë ushtruar kontrolle dhe në një resort luksoz në Fushë Kuqe, ku gjatë kontrollit janë gjetur edhe dy armë zjarri.
Operacioni është ende në vijim, teksa SPAK pritet të dalë në një komunikatë zyrtare në lidhje me këtë operacion.
