Nga Anila Hoxha
Deri ditën kur një patrullim i “Guardia Di Finanza” me policinë shqiptare zbuloi drogën në një bazë ushtarake, reparti i Artilerisë njihej si një segment i Batalionit të Mbështetjes së Luftimit që përdorej më së shumti si një poligon qitjeje.
Me 155 hektarë terren malor, shkurre dhe reparte, dhe vetëm gjashtë vendroje; Artileria përfshihet në strukturën e Forcës Tokësore , së bashku me Batalionet e këmbësorisë, Regjimentin e operacioneve speciale, Batalionin komando dhe të Forcave komando.
Sot me komandantë me karrierë “ të ngrirë” dhe tre ushtarakë zbulimi nën hetim sipas Kodit Ushtarak, çështja e Artilerisë nuk mund të konsiderohet më vetëm e këtij reparti.
Deri verën e 2022 Forcat Tokësore përfshi dhe Artilerinë patën si komandant gjeneralmajor Arben Kingji, sot shef i Shtabit të Përgjithshëm të Forcave të Armatosura . Nga 2020 Kingji pati dy promovime grade, njëra gradë madhore ajo e gjeneralit të brigadës dhe tjetra ajo e gjeneralmajorit ju ngjit ne uniforme një muaj përpara se të merrte detyrën më të lartë në FA. Por megjithë shkëlqimin që ju dha gjeneralmajor Kingjit, njëra nga strukturat nën varësi të tij deri në gusht 2022 (Artileria), me drogën e kultivuar nxjerrin probleme të cilave shefa të shumtë përfshi dhe atë vete ju kanë kaluar rikoshetë. Dhe nuk është vetëm Artileria, së bashku me të Policia Ushtarake, shërbimet mbështetëse dhe një spirale gradimesh nga me të ulëtat deri tek më të lartat që janë të diskutueshme.
Por Artileria shqiptare qëlloi me kanabis dhe qëlloi në shenjë…..
Tre ushtarakët e arrestuar si të dyshuar për shpërdorim detyre , këmbëngulin se kishin parashtruar në kohë të ndryshme problemin e rrethimit. Pavarësisht se kishin firmosur sakaq se kontrolluan bazën dhe nuk gjetën asnjë rrënjë kanabisi. Të tjerat mbetën gumëzhima repartesh që shtrëngojnë radhët sa herë shpërthen një skandal në sipërfaqe
Por ajo për çfarë flasin të dyshuarit është një gardh, i cili në terren dallohet që nuk plotëson asnjë kriter sigurie, pa beton mbështetës, lehtësisht i lëvizshëm dhe deri diku qesharak po te kihet parasysh se përtej tij nuk duhet te kalonte askush.
Por ç’është më e rëndësishme nuk ka asnjë faturë financiare definitive, se sa kushtoi kur 155 hektarë u rrethuan verën e 2022 ashtu shkel e shko. Këto fatura mbetën pa shifra ashtu si shumë të tjera të dyshimta përfshi riparimet e helikopterëve, deri tek materialet e kancelarisë.
Dhe të mendosh se me një ushtarak të larte , vite më parë Policia Ushtarake bëri show, vetëm pse ai kishte investuar në një tualet të jashtëm në bazën e Poliçanit. Çështja u pushua nga prokuroria, por policisë ushtarake i mbeti turpi i arrestimit me kamerat e Policisë Ushtarake në kohën që ministre e Mbrojtjes ishte Mimi Kodheli dhe që u shpërndanë të telekomanduara.
Tani çështjet e ushtrisë shtresëzohen pa u analizuar nëse janë shpërdorime burokratësh, apo pjesë e aferave korruptive . Ashtu si edhe mos zbulimi i kultivuesve që e ka vendosur ushtrinë shqiptare përpara dyshimeve, ose është e pazonja të ruajë territorin dhe kushdo mund të hyjë të mbjellë, të ujitë e të korrë; ose fatkeqësisht mbjellësit e drogës nuk janë banorë të jashtëm. Për të dyja dyshimet , që rrëzojnë hipotezën e tretë që droga të ketë mbirë vetvetiu e të jetë lidhur vetë me spango blu, ushtria shqiptare ka një njollë e cila duhet të vendosë në pozitë të vështirë ATA që e drejtojnë
E dyta, kanabisi i Artilerisë nxori në dritë se nga 500 persona që duhet të ishin të angazhuar në këtë repart, në detyrë gjenden vetëm 194 ushtarakë . Nuk ka një shpjegim nëse ky repart po boshatiset nga dorëheqjet, dhe largimet apo ka arsye të tjera. Ushtarakët e arrestuar thanë në gjykatë se nuk kishin llogjistikë dhe se kishin njoftuar eprorët për mungesën e stafit , rrethimit difektoz, e shumë çështje të tjera që në rastin më të keq flasin për një ushtri të shpartalluar dhe pa plan dhe në rastin më të mirë, rrëfejnë një repart ku ishin mbledhur “ duzina” e të harruarve.
Megjithatë fjala e tyre PAK dhe sidomos është kundër shkresave që si ngaherë do të sigurohen për të shkarkuar problemet tek hallka më e parëndësishme.
Ishte vitit 2016 , kur pa bujë në afërsi të të njëjtit repart u zbuluan disa rrënjë me kanabis dhe historia u mbajt si një çështje ushtrie ( sekret kombëtar) për të ruajtur mbi të gjitha dinjitetin ushtarak . Por asnjëherë nuk u mësua nëse realisht në luftën kombëtare kundër drogës, cila është strategjia dhe plani që kanë Forcat e Armatosura, përderisa mijëra hektarë me toka në male janë territore ushtarake. qindra tunele po ashtu
Është fakt që disa herë në zonën e Shkodrës brenda perimetrit ushtarak, policia ushtarake ka konstatuar deri edhe stane të banorëve. Të tjerë janë kapur duke prerë pemë .
Në repartin e Artilerisë , pranë Babrrusë, pra pranë Tiranës, ushtarakët pranojnë se shumë herë janë kthyer në roje të banorëve që hyjnë pa teklif dhe lahen në dy liqene, pjesë e bazës ushtarake dhe se edhe ata ishin kthyer edhe si çobanë pasi u duhej të largonin bagëtitë e banorëve të zonës. Këtu po flasim për një zonë ushtarake, vend anëtar i NATO-s dhe jo për gardhe të fqinjëve qe i heqin e i vendosin
Nuk duhet të kishte një plan më të detajuar përballë këtyre realiteteve dhe jo kaq të improvizuar?
Pak kohë më parë, ishte pikërisht kjo ushtri që “bëri luftë” me fadromat e një institucioni tjetër që repartin e njohur si ish kimia (tek Kafja e Rremes) , kishte planifikuar ta përshtaste për vend depozitim të automjeteve të sekuestruara.
Cila janë “luftërat” e Forcave të Armatosura SOT, nëse brenda misioneve kushtetuese së pari e përmbi të gjitha nuk ruan dinjitetin e ushtrisë?
