Greqia nuk e ka larguar nga vëmendja çështjen e kryebashkiakut të Himarës, Fredi Beleri, i cili vijon të mbetet pas hekurave që prej arrestimit dy ditë para zgjedhjeve të 14 Majit.
Përveç projektrezolutës që u pranua në Partlamentin Europian pas një bashkimi forcash mes deputetëve të opozitës dhe mazhorancës greke, një sërë zyrtarësh helenë kanë ardhur gjatë këtyre muajve në Shqipëri për të takuar Belerin në burg.
Njëri prej tyre që do të ndalet këtë të premte në kryeqytet është deputeti Angleos Syrigos, i partisë “Demokracia e Re” të kryeministrit Kyriakos Mitsotakis.
Syrigos raportohet se do të ketë një takim në ambientet e paraburgimit, që ndodhet te Qëndra Spitalore e Burgjeve Tiranë (Nënë Tereza), me kryetarin e zgjedhur të Bashkisë Himarë.
Pas takimit, në orën 12:00, Syrigos do të prononcohet për mediat shqiptare, ku edhe do të zbulojë detaje nga takimi.
Fredi Beleri u arrestua dy ditë para se të votëbesohej nga qytetarët e Himarës si kryetari i ri i qytetit bregdetar. Hetimi për të nisi nga Prokuroria e Vlorës në datën 8 Maj me dyshimet se shtabi elektoral i kandidatit të koalicionit “Bashkë Fitojmë” po shpërndante para në këmbim të votave.
Beleri vazhdimisht ka mohuar akuzat, duke drejtuar gishtin nga PS dhe kryeminsitri Edi Rama si organizatorë të një sulmi politik ndaj tij.
Ndërkohë, ai është marrë në mbrojtje dhe nga Athina zyrtare, e cila me tone të ashpra ka kërcënuar Shqipërinë me pengesë në procesin e anëtarësimit në BE.
