Policia e Bulqizës ka arrestuar një 26-vjeçar, pasi është konfliktuar me dy persona, si dhe ka kundërshtuar me dhunë punonjësit e policisë. Në pranga është vënë shtetasi Ertigen Alla banues në Bulqizë.
Autoritetet policore bëjnë me dije se 26-vjeçari për motive të dobëta është konfliktuar me shtetasit B.Ç., 41 vjeç dhe O.V., 35 vjeç, në qendër të qytetit Bulqizës. Gjatë shoqërimit për në komisariat ai ka kundërshtuar me dhunë punonjësit e policisë.
Ai është vënë në pranga nën akuzën për veprën penale të “Kundërshtimi me dhunë i Punonjësit të Policisë”, “Dëmtime të tjera me dashje” dhe “Prishja e qetësisë publike”. Gjithashtu janë proceduar penalisht në gjendje të lirë dhe shtetasit B.Ç., dhe O.V., për veprën penale “Prishja e qetësisë publike” .
Policia sqaron se pamjet e bëra publike dje në disa media dhe rrjete sociale, i përkisnin këtij rasti. Materialet procedurale i kaluan Prkurorisë, për veprime të mëtejshme.
