Nga Bold News.al
Anëtarja e Këshillit të Lartë të Prokurorisë, Nurihan Seiti, nuk ka asnjë lloj lidhjeje zyrtare me Vlorën.
Ajo ka lindur në Përmet, ka jetuar për shumë vite në Fier, ku kanë lindur dy fëmijët e saj, Rei dhe Sentiliana. Tashm është banore në Tiranë, së bashku me bashkëshortin e saj, Hazisin, nga Tepelena.
E, megjithatë, persona të ndryshëm nga Vlora, kryesisht zyrtarë dhe biznesmenë, e njohin djalin e Nurihanit, 33-vjeçarin Rei, i arrestuar së fundmi sepse goditi fizikisht për vdekje inxhinjerin Armand Meshau.
Ai qëndronte shpesh në Vlorë. Po ashtu, edhe nëna e tij, Nurihani dukej shpesh në qytetin bregdetar. Për shumëkënd, ishte e njohur shoqëria që anëtarja e Këshillit të Lartë të Prokurorisë ka me një ish-zyrtar shumë të rëndësishëm në Bashkinë e Vlorës, emrin e tw cilit e posedon edhe “Boldnews.al”.
Ky zyrtar kishte shumë pushtet në dorë, sidomos në dhëniën e leje të ndërtimit.
Pikërisht, në një histori të tillë u përfshi edhe djali i Nurihanit.
Pas arrestimit, Rei Meta deklaroi se kishte një debat me ndërtuesin Meshau, pasi ai nuk po i përmbahej një kontrate mes të dyve, ku djali i zyrtares së lartë të Këshillit të Lartë të Prokurorisë kishte marrë përsipër që të ndihmonte Meshaun për një tokë në Radhimë.
Rei Meta rezulton punonjës në Drejtorinë e Përgjithshme të Doganave dhe nuk ushtron aspak funksionin e agjentit të autorizuar imobiliar, pasi nuk i lejohet diçka e tillë përsa kohë është pjesë e administratës publike.
Atëherë, cili ka qenë pushteti i tij për të ndërhyrë si “sekses” në blerje tokash apo dhëniesh leje ndërtimi në Vlorë?
Dyshimet e para janë që nëna e tij, Nurihani, nëpërmjet pozitës së saj në “qeverisjen e Prokurorisë”, si edhe lidhja e saj me ish-zyrtarin shumë të lartë të Bashkisë Vlorë, të ketë qenë pjesë e “shtrimit të rrugës” së Reit për të bërë sekserin në qytetin bregdetar.
Në këtë drejtim, në orët e fundit ka pasur edhe raportime të ndryshme mediatike, në të cilat pretendohet se Rei Meta u merrte përsipër “sekserllëqe” personave të ndryshëm, duke u prezantuar si “djali i Nurihanit të Këshillit të Lartë të Prokurorisë”.
Gjithësesi, këto deklarime dhe raportime, për momentin, qëndrojnë në kuadrin e “dyshimeve”. E, për të zbardhur të gjithë të vertëtën e rolit të Rei Metaj në Vlorë, krahas goditjes për vdekje të 51-vjeçarit Meshau, mesa duket ka vend për t’u hetuar edhe afaret e tij financiare dhe rolin e mundshëm të nënës së tij në këtë veprimtari fitim-prurëse.
Nëse hetuesit vlerësojnë zgjerimin e hetimit drejt pasurisë, çështja automatikisht kalon në kompetencë të Strukturës së Posaçme Anti-Korrupsion (SPAK), e cila është kompetente për procedimet penale ndaj anëtarëve të Këshillit të Lartë të Prokurorisë.
Dhe, vend duket se ka edhe për këtë hetim. Rei Meta ka deklaruar para oficerëve të Policisë Gjyqësore se ka pasur një kontratë me Armando Meshaun.
Në bazë të kontrate, djali i Nurihanit do të ndihmonte Meshaun me një tokë në Radhimë dhe do të përfitonte një apartament 60 metra katrorë në ndërtimin e kryer në këtë truall.
Pra, siç e pranon edhe ai vetë, ekziston një kontratë “shkëmbimi”, me bazë ndërhyrjen “seksere”.
Rei Meta është subjekt i deklarimit të pasurisë, si familjar i zyrtares së lartë, Nurihan Seiti.
Hetimi do të duhet të provojë nëse ai e ka deklaruar këtë kontratë, e cila do t’i siguronte një apartament në Radhimë të Vlorës.
