Konservatorët- duke përfshirë një ministër kabineti – thonë se partia e tyre ka të ngjarë të bëjë fushatë për t’u larguar nga Konventa Evropiane për të Drejtat e Njeriut (GJEDNJ) në zgjedhjet e ardhshme, nëse fluturimet në Ruandë për emigrantët e paligjshëm vazhdojnë të bllokohen. Ministri, i paidentifikuar, i tha BBC-së se Mbretëria e Bashkuar “ndoshta” po ndëshkohej për Brexit-in.
Qëndrimi zyrtar i qeverisë është se Britania e Madhe do të mbetet në GJEDNJ. Një zëdhënës tha: Qeveria ka qenë e qartë se do t’i përmbahet detyrimeve të traktatit ndërkombëtar. Siç e kemi përcaktuar më parë – ne besojmë se projektligji ynë Stop the Boats do të sjellë ndryshimet e nevojshme për të reduktuar stimujt për njerëzit që të rrezikojnë jetën e tyre përmes kalimeve të paligjshme duke mbetur palë në GJEDNJ.
Megjithatë, sekretari i emigracionit Robert Jenrick nuk do të përjashtonte tërheqjen nga konventa, duke i thënë Times Radio se qeveria do të bënte “çfarëdo që është e nevojshme në fund të fundit për të mbrojtur kufijtë”.
Pse Britania e Madhe dëshiron të dërgojë azilkërkues në Ruandë?
Sir Bob Neill, kryetari konservator i Komitetit të Drejtësisë në Commons, tha se do të ishte “një ide krejtësisht e marrë dhe absolutisht e gabuar” që Britania e Madhe të largohej nga GJEDNJ. Ai i tha BBC-së se të qenit jashtë GJEDNJ-së do ta linte Mbretërinë e Bashkuar në shoqërinë e Bjellorusisë dhe Rusisë dhe do të kishte një rrezik që reputacioni ndërkombëtar i Britanisë të “dëmtohej shumë seriozisht”.
GJEDNJ u themelua në vitin 1950 nga një numër vendesh, përfshirë Britaninë e Madhe. Traktati, i cili përcakton të drejtat dhe liritë që u takojnë njerëzve në 46 vendet nënshkruese, mbikëqyret nga Gjykata Evropiane e të Drejtave të Njeriut. GJEDNJ është e ndarë nga Bashkimi Evropian – kështu që Mbretëria e Bashkuar mbeti pjesë e saj pas Brexit.
Gjykata e Apelit e Mbretërisë së Bashkuar vendosi kundër planit muajin e kaluar, për habinë e Ministrisë së Brendshme. Tani do të ketë një apel në Gjykatën e Lartë në vjeshtë, por të gjithë janë të pasigurt nëse mund ta rrëzojnë vendimin. Ata kanë frikë se edhe nëse qeveria fiton, mund të duhen shumë muaj që të fillojnë dëbimet. Plane alternative janë duke u shqyrtuar gjithashtu.
Qeveria gjithashtu tani ka fuqinë të injorojë disa urdhëresa të përkohshme të GJEDNJ-së në lidhje me sigurinë kufitare.
Laburistja Yvette Cooper, akuzoi konservatorët se kishin dështuar në trajtimin e krizës. Ajo i tha BBC-së: E gjithë kjo retorikë po e bën më të vështirë arritjen e llojeve të marrëveshjeve që na duhen me Francën, me vendet e tjera evropiane, për të trajtuar në fakt këtë problem dhe për të parandaluar në radhë të parë këto kalime të rrezikshme.
Disa mbështetës kanë thënë se konservatorët duhet të bëjnë fushatë për t’u larguar në zgjedhjet e ardhshme, pavarësisht se çfarë ndodh me skemën e Ruandës./BBC
