Gjykata e Janinës ka vendosur të rrezojë kërkesën e prokurorisë Shqiptare për ekstradimin e Laert Haxhisë.
Haxhia do qëndrojë në burg vetëm për largim nga vendi aksidentit dhe prishje të qetësisë publike.
Pavarësisht vendimit për refuzim të ekstradimit, prokuroria themelore e Janinës pritet ta Apelojë vendimin në Gjykatën e Apelit, duke kërkuar ekstradimin e Laert Haxhiut në Shqipëri.
I kontaktuar në telefon nga “Ora News” avokati i Laert Haxhiut konfirmoi vendimmarrjen e drejtësisë helene duke u shprehur se beteja ligjore do vijojë në Apel deri në gjykatën e Lartë Greke.
Laert Haxhiu ishte shpallur nga Policia e Shtetit si një nga 5 personazhet më të kërkuara të drejtësisë, teksa ishte në kërkim për masakrën e 11 shtatorit 2017, ku humbën jetën Jurgen Hoxha dhe Samir Latifi në Lushnjë.
Laert Haxhiu qëndronte në shtetin fqinj me dokumente të falsifikuara. Në lejen e qëndrimit greke, ai mbante identitetin si Mikis Askalidis, 32 vjeç, lindur në Gjeorgji.
Gjykata e Lushnjës, në vitin 2017, e ka dënuar 31-vjeçarin me 18 vjet burgim, për veprat penale “Vrasja në rrethana cilësuese”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe i municionit”. Ai akuzohet se në bashkëpunim me Orges Bilbilin ekzekutuan me breshëri plumbash Jurgen Hoxha dhe Samir Latifi në një lokal.
Orges Bilbili është dënuar me burgim të përjetshëm nga Gjykata e Posaçme për vrasjen e dyfishtë në qytetin e Lushnjes.
