Kryeministri Edi Rama vijon të hiqet si i pafajshëm lidhur me aferën e inceneratorëve, duke deklaruar se e “kanë ngrënë pas shpine”. Megjithatë, angazhimi i qeverisë së drejtuar e bën alibinë e tij shumë të vështirë për tu besuar.
Kronologjia e ngjarjeve të renditura si po poshtë hedh poshtë versionin e Ramës dhe forcon akuzat se pikërisht ai është koka e asaj që cilësohet afera më e madhe e viteve të fundit.
Në verën e vitit 2019, Edi Rama deklaron publikisht projektin e tij për të kthyer në park të gjelbër zonën e mbetjeve në Porto Romano, ashtuquajturi “Eco Park Durrës”. Kreu i qeverisë do të deklaronte se do ta bënte këtë me ndihmën e privatit.
Tre muaj më vonë, në 16.10.2019, AKUM ku Alqi Bllako ishte drejtor, shpall tenderin për ndërtimin e Eco Park Durrës. Procedura anulohet ne më 03.12.2019, vetëm 3 dite përpara se të hapeshin ofertat.
Më 16.12.2019 Rama firmos një vendim si kryetar i Komitetit Ndërministror të Emergjencave Civile. Ne vendim ka dy pika:
a- Mbetjet e krijuara nga tërmeti i 26.11.2019 për qarkun Tiranë, Lezhë e Durrës do të depozitohen në lanfildin e Porto-Romanos.
b- AKUM ngarkohet të marrë masa për inkapsulimin e zonës së Porto-Romanos dhe rijetësimin e kësaj zone me procedure të përshpejtuar në kushtet e emergjencës së krijuar.
Më 21.12.2019, midis kompanisë “Victoria Invest International” sh.p.k dhe kompanisë “De Mare” s.r.l lidhet një marrëveshje bashkëpunimi (JV) për të marre pjesë në procedurën tenderuese të AKUM.
Më 27.12.2019 midis AKUM dhe bashkimit të kompanive De Mare & Victoria lidhet kontrata me negocim të drejtpërdrejtë në vlerën 1.9 miliard lekë të reja, apo ndryshe 17 milionë euro.
Më 14.05.2020, pra rreth pesë muaj më vonë, midis JV De Mare s.r.l & Victoria Invest dhe Kompanisë ARTCON sh.p.k, në pronësi të Denis Ymerit, lidhet një kontratë nënkontraktimi për punime civile në Porto Romano, në vlerën 649 milion leke të reja, apo 6 milion euro.
Që prej datës 15.03.2020 Denis Ymeri rezulton i punësuar si shofer pranë “INTEGRATED ENERGY sh.p.k”, me pronar faktit sipas SPAK Mirel Mërtirin dhe Klodian Zoton. Kompania ARTCON është themeluar nga Ilsa Zoto, bashkëshortja e Klodian Zotos. Më 23.11.2016, Ilsa Zoto i shet aksionet te Denis Ymeri. Më 04.05.2020, kompania ndryshon emrin nga Artemis Farm ne ARTCON.
Le të kthehemi mbrapsht në kohë – Më 01.04.2019, lidhet një kontratë midis Integrated Energy, kompanisë së Inceneratorit të Tiranës dhe studios arkitekturore Casanova-Hernandez. Objekti i kësaj kontrate është zhvillimi i projektit Eko Park në Durrës mbi Landfildin ekzistues në Porto Romano. Vlera e kontratës është 225.000 Euro.
Casanova – Hernandes është në fakt një zyre arkitektesh shume e preferuar nga qeveria shqiptare. Ajo ka përfituar shumë projekte nga qeveria Rama, nga Fondi Shqiptar i Zhvillimit dhe Agjencia e Zhvillimit te Territorit.
Një ndër projektet kryesore është dhe rikonceptimi i Muzeut Kombëtar, një projekt 13 milion euro i fituar nga Casanova Hernandez dhe partneri lokal “I Ri”. Kjo është kompania ku punon thjeshtra e Edi Ramës.
Pra Klodian Zoto rezulton se e dinte përpara se edhe vetë Edi Rama se çfarë do të ndodhte në Porto Romano në Durrës. Ai kontraktoi studion Casanova Hernandez, për të bërë një projekt mbi Porto Romanon, 3 muaj përpara se Edi Rama të deklaronte se do ta zhvillonte projektin nëpërmjet bashkëpunimit me privatin, dhe 6 muaj përpara se AKUM ta shpallte garën të cilën vetë Edi Rama më pas e anuloi.
Logjika të çon në dy mundësi: Ose Klodian Zoto i prezanton Edi Ramës idenë e tij për landfillin e Porto Romanos, ose Edi Rama thërret Klodian Zoton dhe ia ngarkon personalisht këtë detyrë, shumë përpara se ta shpallte atë publikisht.
Në të dyja rastet, del lidhja kryekëput e kryeministrit Edi Rama me aferën e inceneratorëve dhe zbulohet roli i kreu i qeverisë si kumbari i aferës.