Kreu i PD-së, Sali Berish ka reaguar në lidhje me lajmet e publikuara nga një grup portalesh pranë qeverisë se pas kullës 205 metër të lartë “Mount Tirana” në qendër të Tiranës, tek Rruga e Barrikadave, qëndron opozita dhe financuesit e saj.
I pyetur nga gazetarët në një konferencë për mediat, Berisha i konsideroi ato lajme si “shpifje të kuzhinës Fuga-Veliaj”. Ai sfidoi kryeministrin Edi Rama duke i bërë thirrje që të anulojë lejen e ndërtimit. Sipas tij, e gjitha kjo po bëhet për të hequr vëmendjen nga afera e inceneratorëve.
Berisha: Shpifje dhe trillime nga kuzhina Veliaj-Fuga. Përpjekja është të krijojë një zhurmë për të shuar flakët e djegësit të Tiranës që nuk ekziston. Gjatë qeverisjes së PD, Berisha nuk ka dhënë asnjë leje për asnjë kullë. Plani që ka miratuar KKRT në 2012, ka qenë për ndërtimin e ndërtesave me lartësi 6-8 kate në të gjithë territorin e Tiranës. Ata që duan të më atribuojnë mua janë shpifarakë të mjerë. Nëse Edi Rama paska dhënë leje për Shkëlzen Berishën duhet të kesh humbur çdo mendje, të bëhesh shpifës i kalibrit të Ymer Bazes dhe Carlo Bolinos të nxjerrësh shpifje të tilla. Megjithatë e ftoj Edi Ramën të anulojë menjëherë lejen. PD del sot me deklaratën e saj në të cilën paraqet çështjet e thella ligjore që ekzistojnë për atë ndërtim. Përpiqen të mbulojnë duke shpifur trillime. Këto janë gjëra të mjera dhe të dështuara. Unë nuk kam dhënë asnjë kullë dhe nuk do të jepja, përveçse po të zgjidhej një zonë e pandërtuar.
