Janë zbardhur detaje të reja nga diskutimet me dyer të mbyllura ditën e djeshme në mbledhjen e Këshillit Kombëtar të PD-së.
Mësohet se një prej zërave kritik ka qenë edhe ish-deputeti Myslim Murrizi, i cili i ka bërë thirrje kreut të PD-së Sali Berishës që të shmangë koalicionin me Partinë e Lirisë së Ilir Metës në vitin 2025. Ai ka deklaruar se nuk ka asgjë personale me Metën, por nuk mund të bëhet dot me të.
Po ashtu ai u shpreh skeptik për faktin se Gazment Bardhi ka të drejtë firme, që sipas tij ngjall pasiguri. Ndër të tjerë, ai ka deklaruar se duhet të jenë deputetë e grupit të Gaz Bardhit që duhet të vijnë tek ta dhe jo e kundërta, pasi sipas tij, ata nuk kanë peshë në elektorat, duke i përmendur edhe me erma konkretë.
“Do të doja që në mbledhje të diskutonin anëtarëve Këshillit Kombëtar të PD. Jam ndjerë keq. Se di si është ndjerë zoti Noka, kur me firmat e atyre që i kanë kërkuar t’ia japë, i ka shkarkuar vetë. Noka, që është sekretar, ia jep firmën, Bardhit për sekretar, kjo është tallje. Fakti që Bardhi ka të drejtë firme, ngjall pasiguri për PD-në. Nëse e shihni kështu dhe thoni se çdo gjë po shkon vaj, e keni gabim. Jam dakord me atë çfarë thotë zoti Berisha, por të mos shkojmë ne tek ata, por të vijnë ata tek ne. Del Korreshi dhe thotë; unë makinën e parkoj te PD. Pse ça është PD-ja është parkim? Pse atë duam ne se ku e parkon makinën Gazi?
Koha do t’i zbuloj. Jo më larg se dje, Gazment Bardhi tha ‘Basha është njësoj si Berisha’. Ky parimor i madh. Unë kam që në vitin 1997 në opozitë me ju dhe nuk e ndryshoj qëndrimin tim. PD ka vuajtur nga ‘shqyerja e dyerve’. I shtytë dyert në vitin 2005, po ku i ke sot Bashën, Benet Beçin për Majlinda Bregun! U bënë biznesmenë, një më ndërtimet, një me zyrë konsulence. Shyqyr që s’ka pasur as Facebook në 2005-2013 dhe s’ka pasur asnjë teknologji. Treçereku i atyre që na kafshuan pas shpine do të ishin në kokërr burg si hajdutë. Ça vlera ka Flutura Açka me 1100 veta në Elbasan, kush është Oriola Pampuri? Kush është Dritani apo Kreshniku?!
Ndaje mendjen se nuk shkon. Unë kërkoj lëvizje konkrete për të ndryshuar ligjin në Kuvend nga ju deputetët këtu. Partitë duhet të ndajnë mendjen se çfarë do bëjnë për zgjedhjet e ardhshme. Unë nuk shkoj dot te Ilir Meta. S’kam asgjë personale me të, por kur u nda me Nanon në 2004 ishte si ndarje marksiste-leniniste. Nuk më bëjnë duart. Po të ishte emri yt, (Berisha) në atë fletë votimi, do kishim marrë më shumë vota, por ishte ai i Metës.”, është shprehur Murrizi.
