Më shumë se 100 bimë kanabisi janë zbuluar të mbjella brenda territorit të repartit ushtarak në Zall Her. Burime zyrtare nga policia konfirmuan këtë të Shtunë se gjatë kontrollit në territorin e repartit, u gjetën të kultivuara dhe u asgjësuan 125 bimë kanabisi.
Lidhur me zbulimin, tre ushtarakë janë vënë në pranga për shpërdorim detyre. “U arrestuan në flagrancë për shpërdorim të detyrës, 3 punonjës të repartit ushtarak, shtetasit: Gramoz Mullai, 52 vjeç, me detyrë Shef Seksioni i Sigurisë; Rustem Koçi, 25 vjeç, me detyrë Specialist për Zbulimin dhe Gentian Zhurda, 45 vjeç, me detyrë Specialist Sigurie”, njoftoi policia.
Ndërkohë janë proceduar penalisht 4 ushtarakë të tjerë. “Gjithashtu u proceduan penalisht dhe 4 shtetas të tjerë: A. J., 41 vjeç, me detyrë Specialist Infrasktrukture; P. H., 52 vjeç, me detyrë Zv/Komandant toge; I. D., 47 vjeç, me detyrë magazinier; P. D., 57 vjeç, me detyrë Komandant Reparti”, njoftoi policia.
Sipas uniformave blu, këta persona, “me veprimet dhe mosveprimet e tyre, duke shpërdoruar detyrën, kanë lejuar kultivimin e bimëve narkotike, në ambientet e repartit ushtarak”.
Hetimet ndërkohë, deri në këtë fazë, nuk kanë arritur të zbulojnë përgjegjësit e kultivimit të bimës narkotike.
Burime zyrtare nga blutë thanë se kontrolle për hashash po kryhen në gjithë territorin e vendit, ndërsa njoftuan edhe dy raste të sekuestrimi të bimës narkotike në Selenicë dhe Fier.
Ministri i Brendshëm Taulant Balla tha në një postim në rrjetet sociale se “lufta kundër kultivimit, trafikimit dhe shpërndarjes së lëndëve narkotike do të jetë sistematike”.
Pas tij, reagoi dhe ministri i Mbrojtjes Niko Peleshi, i cili saktësoi se hashashi u gjet në një zonë të pyllëzuar brenda repartit.
Ai vuri në dukje po ashtu se aksioni në Zall Herr ishte një bashkëpunim mes Policisë Ushtarake dhe asaj të Shtetit, detaj që nuk u evidentua në njoftimin e Policisë së Shtetit.
“Bashkëpunimi mes Policisë së Shtetit dhe Policisë Ushtarake, bëri të mundur evidentimin dhe më pas asgjësimin e 125 bimëve kanabis, të cilat ishin kultivuar në një zonë të pyllëzuar, në territorin e zonës ushtarake të Zall Herrit. Menjëherë janë pezulluar nga detyra të gjithë personat përgjegjës. Dënojmë me forcë çdo aktivitet të kundërligjshëm. Inkurajojmë organet ligjzbatuese të bëjnë detyrën në çdo rast”, shkroi ai në rrjetet sociale.
