15 395 bimë të dyshuara narkotike të llojit kanabis janë zbuluar këtë të premte në qarkun e Shkodrës. Më konkretisht bimët u gjetën në disa fshatra si, Vau i Dejës, Malësi e Madhe dhe Pukë, dhe më pas u asgjësuan përmes djegies.
Ndërkohë janë arrestuar 4 persona dhe janë shpallur në kërkim 9 të tjerë të cilët dyshohen si kultivues të këtyre bimëve narkotike.
Mësohet se gjatë fazave të mëparshme të këtij megaoperacioni, janë asgjësuar në total 58 184 rrënjë dhe bimë narkotike kanabis.
“Shërbimet e Policisë të DVP Shkodër dhe të Komisariateve të Policisë Shkodër, Vau i Dejës, Malësi e Madhe dhe Pukë, në bashkëpunim me Drejtorinë Rajonale AMP Shkodër-Lezhë dhe me FNSh Tirana, si rezultat i kontrollit të territorit, duke përdorur dhe dronë, kanë finalizuar fazën e njëmbëdhjetë të megaoperacionit policor antikanabis të koduar “Alpe të pastra”, në përfundim të së cilës u asgjësuan në total 15 395 bimë të dyshuara narkotike cannabis sativa, prej të cilave:
13867 bimë në Pult, Shosh, Shalë dhe Rrethina, Shkodër; 1145 bimë në fshatrat Toplan dhe Vig, Vau i Dejës; 133 bimë në fshatin Kastrat, Malësi e Madhe dhe 250 bimë në Fushë Arrëz, Pukë.
-Gjatë fazave të mëparshme të këtij megaoperacioni, janë asgjësuar në total 58 184 fidanë dhe bimë narkotike cannabis sativa, janë vënë në pranga 4 autorë të dyshuar dhe janë shpallur në kërkim 9 të tjerë”,- njofton Policia.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme hetimore.
