“Ajo po ulërinte, siç bënte gjithmonë, më pas nuk mbaj mend asgjë”.
Këto janë fjalët e 48-vjeçarit shqiptar Ilir Zyba Shehit, i cili ka dëshmuar paraditen e sotme para hetuesve të Rovereto (Itali), për krimin që kreu mbrëmjen e së premtes, ku vrau me sëpatë fqinjen e tij 63-vjeçare Mara Fait. Mediat përtej Adriatikut raportojnë se e gjithë dëshmia e shqiptarit ishte në lot, për shkak të pendesës së thellë që ai ka shfaqur për krimin e rëndë.
Ilir Zyba Shehi dhe Mara Fait kishin prej disa vite sherre dhe tensione me njëri-tjetrin që lidheshin me jetesën në të njëjtën godinë. Shqiptari ka pranuar para hetuesve raportin e vështirë me fqinjen e shtëpisë, e më pas episodin tragjik të së premtes.
Gjithçka ndodhi rreth orës 20:00 të mbrëmjes, kur shqiptari me sytë e errësuar e goditi gruan me sëpatën që po përdorte për të bërë punë rreth shtëpisë
Megjithatë ende nuk ka detaje për rrethanat që çuan në vrasjen, për të cilën 48-vjeçari thotë se nuk mban mend asgjë. “M’u errësuan sytë”, ka përsëritur ai disa herë para autoriteteve. Por, mban mend mirë të gjitha denoncimet mes familjes së tij dhe atë të fqinjes. Në rastin e Shehit çështjet ishin mbyllur, ndërsa Mara Fait duhet të dilte para gjykatës pas disa muajsh, për akuzën e plagosjes së bashkëshortes së shqiptarit. Një seancë kjo, që sigurisht tashmë nuk do të mbahet.
Nga denoncimet mes dy fqinjëve të shtëpisë dalin fyerje, kërcënime, provokime, video të regjistruara me telefon për të provuar të drejtën e secilit, megjithatë tani akuza më e rëndë është ajo e vrasjes me dashje, që rëndon mbi 48-vjeçarin shqiptar
