Pjesëmarrja e votimit për Bashkinë e Rrogozhinës ditën e sotme, e ka tejkaluar pjesëmarrjen në zgjedhjet e 14 Majit, edhe pse mbeten edhe rreth dy orë nga mbyllja e procesit të votimit.
Mediat raportojnë se aktualisht pjesëmarrja në votime është 32.47%, teksa më 14 maj në total votuan 32.02%. Në total janë rreth 33 mijë qytetarë me të drejtë vote.
Në garë për kreun e bashkisë së Rrogozhinës janë dy kandidatët Edison Memolla i Partisë Socialiste dhe Shkëlqim Hoxha i koalicionit “Bashkë Fitojmë”, të cilët më 14 Maj diferenca mes tyre u ngushtua në vetëm 14 vota, një rezultat i vendosur nga kutia e burgut në favcor të kandidatit socialist (shumë e kontestuar), teksa ditën e sotme të burgosurit nuk kanë të drejtë vote. Kolegji Zgjedhor pas problematikave të konstatuara, vendosi ripërsëritjen e zgjedhjeve.
Ditën e sotme votimi nisi me disa probleme, për shkak të fotografimit të votës nga një çift bashkëshortësh në qendrën e votimit 22-23, ç’ka çoi më pas edhe në ndërprerjen e procesit për disa minuta.
Për këtë incident reagoi menjëherë edhe Kryekomisioneri Ilirjan Celibashi, i cili tha se shqetësim mbetet edhe votimi familjar.
“Fotografimi i votës përbën një shkelje të rëndë të ligjit penal, ka sanksione dënimi që shkojnë deri në 3 vjet. U bëj thirrje të gjithë votuesve që t’i shmangen çdo lloj joshje nga subjektet për t’u treguar atyre se për kë kanë votuar. Ata rrezikojnë shumë në këtë rast. Votimi familjar gjithashtu përbën shkelje. Ky është një problem, sa të kemi mundësi do ta adresojmë.”
Ndërsa nënkryetarja e KQZ, Lealba Pelinku, pas vëzhgimit në terren konstatoi një pjesëmarrje të lartë të personave të paautorizuar në qendrat e votimit.
“Jam drejtuar drejt kësaj qendre për të parë se çfarë ka ndodhur. Komisioni duhej të mbante procesverbal. Unë e hasa personalisht në 4 qendra votimi në shkollën Lekaj, ku vihej re një prani personash të pautorizuar pa bexh që nuk duhet të rrijnë në qendrat e votimit.
Votimi nisi në orën 07:00 të mëngjesit në 55 qendrat e ngritura, për t’u mbyllur në orën 19:00 të mbrëmjes. Nuk dihet nëse numërimi i votave do të nisë menjëherë apo jo, pas mbylljes së procesit të votimit, për shka se disa prej numëruesve, mësohet se kanë qenë gjatë ditës dhe në rolin e vëzhguesve apo komisionerëve.
