Nga Boldnews.al
Disa javë pasi SPAK dërgoi për gjykim ish-drejtoreshën e Autoritetit Rrugor Shqiptar, Sonila Qato, për abuzime me detyrën për ndërtimin e rrugës Kardhiq-Delvinë, pasardhësi i saj në detyrë, Evis Berberi ka firmosur një tender të dyshimtë për të njëjtën rrugë. Madje, për tunelin Kardhiq-Delvinë, për të cilin do të gjykohet Qato dhe 9 zyrtarë të tjerë të ARRSH-së. Po nëse ish-drejtoresha po përballet me drejtësinë, a ka të njëjtin fat edhe Berberi?
Duket se Berberi vetëm sa merr urdhra nga eprorja e tij, Belinda Balluku, e cila hë për hë duket e paprekshme nga SPAK-u dhe nga institucionet e tjera ligjzbatuese. Aq sa del edhe në video ballëlartë krah për krah me kryeministrin tonë gjatosh. Ndërkohë, në dalje të tjera, Balluku preferon edhe Berberin, duke bërë edhe propagandat në disa akse rruge që kanë ndërtuar. Ndër to edhe rruga Kardhiq-Delvinë, ndërtimi i së cilës i ka dalë jashtë parashikimeve, pasi janë shpenzuar më shumë se 50 milionë euro sesa projekti fillestar dhe deri më tani askush nuk mban përgjegjësi. Ndërkohë, tenderi i fundit vetëm sa thellon këtë bilanc, pasi me procedura të dyshimta, duke s’kualifikuar ofertën më të ulët, Berberi ia ka falur mirëmbajtjen e tunelit firmës “Salillari”.
Sipas dokumenteve që disponon BoldNews.al, Autoriteti Rrugor Shqiptar ka shpallur fituesin e tenderit për mirëmbajtjen e tunelit të rrugës Kardhiq-Delvinë. Dokumenti i mësipërm i ka dhënë firmës “Salillari” plot 800 mijë euro.
Njoftimi është dhënë në datën 20 korrik 2023, për tenderin me objekt “mirëmbajtja e rrugës Kardhiq-Delvinë, Loti-7 (Tuneli)”. Fondi për këtë tender ishte 86.870.520 lekë, pa TVSH. Në tender mori pjesë firma “ALKO IMPEX CONSTRUCTION” me vlerë 82.508.000 lekë, “HTM” me vlerë 74.715.100 lekë, “ILIRIADA” me vlerë 85.205.000 lekë dhe “SALILLARI” me vlerë 80.709.000 lekë. Më pas, Berberi ka “qethur” firmën që ofroi më pak, “HTM” pasi “operatori ekonomik duhet të paraqesë dëshmi për realizimin me sukses të një ose disa kontratave për shërbimet e mëparshme, të ngjashme, të kryera gjatë tre viteve të fundit nga data e shpalljes së njoftimit të kontratës, në një vlerë jo më të vogël se 40 % të vlerës së fondit limit të kësaj kontrate”.
Një skemë e gatshme në shumicën e tenderëve të ARRSH-së, e cila i “qep” dokumentet standarde për t’ia dhënë firmës së preferuar. Në këtë rast, ishte “Salillari” që vetëm në vitet e fundit ka qenë një nga përfituesit kryesore të fondeve të Autoritetit Rrugor Shqiptar. Megjithëse është përfolur në disa skandale me rrugët, sërish Berberi e ka të “favorizuar”, ndërsa pas punëve në Berat, Tiranë e gjetkë, po shikon edhe tenderët në bregdet. Ndoshta, për t’u shpallur më pas si investitorë strategjike siç kanë bërë të gjithë kolegët e tij.
