Nënkryetari i Partisë së Lirisë, Petrit Vasili ka shkuar paraditen e kësaj të premte në Prokurorinë e Posaçme kundër Korrupsionit dhe Krimit të Organizuar (SPAK).
Burime bëjnë me dije se ai do të dëshmojë në lidhje me dosjen e lobimit të LSI-së në SHBA.
Në kallëzimin penal të dorëzuar në SPAK, të publikuar nga mediat,m thuhet se Petrit Vasili, si përfaqësues i LSI-së, ka firmosur një nga kontratat e lobimit me kompaninë Global Security and Innovative Strategies, në 3 shkurt 2016, ku janë paguar 123 mijë USD, për t’i mundësuar takime ish-kreut të LSI-së, Ilir Meta me anëtarë të Kongresit në SHBA, takime me zyrtarë të Departamentit të Drejtësisë dhe të Departamentit të Shtetit.
Ky shpenzim nuk është deklaruar as nga LSI-ja në KQZ dhe as nga Ilir Meta, Monika Kryemadhi dhe Petrit Vasili në ILDKPKI. Sipas kallëzuesit jemi para veprave penale të pastrimit të parave, fshehjes së pasurisë, korrupsionit dhe falsifikimit.
