Gjykata e Posaçme ka miratuar masën e sigurisë “arrest me burg” në mungesë për ish-zëvendëskryeministrin kryeministrin, Arben Ahmetaj. Shkresa i është dorëzuar Policisë si institucioni që duhet të kryejë ekzekutimin, nga Prokuroria e Posaçme.
Masa u kërkua nga SPAK, që e akuzon Ahmetajn se në rolin si ministër i Financave ka favorizuar kompanitë që kanë përfituar kontratat koncesionare për inceneratorët e Elbasanit dhe Fierit, pas të cilave janë Mirel Mërtiri dhe Klodian Zoto.
Prokuroria e akuzon Ahmetajn se ka përfituar prona dhe qindra mijëra euro nga Zoto e Mërtiri. Këto janë bërë përmes disa transaksioneve që janë përpjekur të kamuflohen duke përfshirë disa biznesmenë të tjerë, vlerëson akuza. Po ashtu, hetimet tregojnë se Ahmetaj ka bujtur në hotele luksoze të paguara nga Klodian Zoto. Nisur nga këto prova, SPAK ka ngritur ndaj tij akuzën e korrupsionit pasiv.
Gjithashtu, ish-ministri akuzohet se pasuritë e përfituara nuk i deklaruar sipas legjislacionit në fuqi. Në këto kushte, ndaj tij janë ngritur dhe akuzat e mosdeklarimit së pasurisë dhe pastrimit të parave.
Të premten e kaluar, parlamenti miratoi një kërkesë nga SPAK për arrestimin e deputetit të PS-së Arben Ahmetaj, pas një diskutimi dy-ditor në Këshillin e Mandateve.
Pas kësaj, SPAK i sekuestroi disa pasuri ish-ministrit, që i cilëson të përfituara në mënyrë korruptive nga Zoto dhe Mërtiri. Më herët, SPAK ka sekuestruar dhe dy vila, një në Hamallaj dhe tjetra në Palasë.
Vetë Ahmetaj, përmes disa postimeve në rrjetet sociale, ka mohuar akuzat që rëndojnë tij. Një prej avokatëve të tij ka deklaruar publikisht se ish-ministri ndodhet në Angli. Zëra të tjerë pretendojnë se ai po fshihet në Lindjen e Mesme.
Opozita ka hedhur akuza se Ahmetaj është lajmëruar për kërkesën e SPAK dhe ka përfituar duke u arratisur jashtë vendit.
Sipas procedurës, policia pritet të kryejë kërkime brenda vendit për ish-ministrin dhe më pas ta shpallë në kërkim ndërkombëtar në kushtet e mos gjendjes.
Avokati i Ametajt ka deklaruar se ish-ministri “do të rikthehet kur të fitojë pafajësinë”, duke lajmëruar se nuk do të ketë një dorëzim të ish-numrit dy të qeverisë te organet e drejtësisë.
