Kuvendi votoi këtë të Premte kërkesën e SPAK për arrestimin e ish-ministrit të Financave Arben Ahmetaj. Nga 119 deputetë prezent, 117 votuan pro kërkesës dhe 3 abstenuan (Vangjel Dule, Fatmir Mediu dhe Agron Duka). Kryeministri Edi Rama votoi pro arrestimit të ish-zëvendëskryeministrit.
Ndërsa vetë Ahmetaj nuk ishte prezent në seancë. Ky i fundit, përmes një reagimi në rrjetet sociale më herët gjatë ditës, tha se është larguar nga vendi për “arsye familjare”, ndërsa hodhi poshtë akuzat e prokurorisë. Avokati i Arben Ahmetajt, Henrik Ligori saktësoi për gazetarët pas seancës plenare se ish-ministri ndodhet “pranë familjes në Agli” dhe do të kthehet në vend “kur të firojë lirinë”.
Para votimit në Kuvend, Gazment Bardhi nga opozita dhe Arben Pëllumbi nga PS lexuan raportet për kërkesën e SPAK të hartuara pas mbledhjeve të Këshillit të Mandateve.
Arben Ahmetaj akuzohet për korrupsion pasiv, fshehje pasurie dhe pastrim parash. Sipas akuzës, Ahmetaj ka përfituar qindra mijëra Euro nga Klodian Zoto dhe Mirel Mërtiri duke i favorizuar që kompanitë e tyre dhe të tjera të lidhura me të ashtuquajturit bosët e inceneratorëve të përfitojnë tre kontratat koncesionare për inceneratorët e Elbasanit, Fierit dhe Tiranës.
Pas konsensusit të deputetëve për arrestimin e ish-ministrit të Financave përfundoi dhe seanca që kishte vetëm votimin e raportit të prokurorisë në rend dite.
Në një deklaratë për gazetarët pas seancës, deputetja demokrate Jorida Tabaku kërkoi avancimin e hetimeve për inceneratorin e Tiranës. Ndërsa kreu i PD-së, Sali Berisha, duke iu referuar socialistëve, tha se gjysma e sallës së Kuvendit ishte meite. “Si do ta quajmë sallën e parlamentit sot? Ishte gjysma e saj, gjysmë ishte meite. Shihnin njëri-tjetrin se kur do u fluturonte mandati. Rama ia mbathi kur u lexua raporti, pati frikë se do e pyesnim. Pastaj mezi doli nga salla Gjiknuri, nuk e keni idenë sa shumë janë. Klotilda, që bënte amendamente personale për Tiranën, etj, etj. E vërteta është se për ta sot, i akuzuar nuk ishte Ahmeti, por Ahmeti ishte prokurori i tyre”, tha Berisha.
Nga kampi tjetër, kryeministri Edi Rama, përmes një reagimi në Twitter, lajmëroi se “pasdite në 18.30 do t’i drejtohem opinionit publik me një adresim për votimin e sotëm në Kuvend”.
