Skënderbeu pret sot t’i bashkohet edhe mbrojtësi i djathtë, Andrea Gërxho, ndërsa mesfushori brazilian, Juri Merlim, do të vijë pas disa ditësh në Korçë.
Këto janë dy afrimet më të fundit në merkato, ndërsa lëvizje të tjera të bardhekuqve zbulohen nga drejtori sportiv, Ardi Gjançi, në një bisedë për “Panorama Sport”.
Ai bëri të ditur se Skënderbeu ka filluar të konsolidohet dhe po merr formën e duhur që të gjithë presin për sezonin e ri. Sipas Gjançit, korçarët do të jenë vigjilent në merkato deri në mbyllje të saj.
“Dua të konfirmoj si fillim zyrtarizmin e dy lojtarëve, si Andrea Gërxho që do të bashkohet sot me ekipin në seancën stërvitore dhe do të jetë menjëherë nën urdhrat e trajnerit, ashtu edhe të brazilianit Juri Merlim, që ka nënshkruar kontratën me ne dhe pritet të vijë në vijim. Jemi në pritje edhe të katër lojtarëve të tjerë që janë zyrtarisht pjesë e Skënderbeut, por është procedura e pajisjes me vizë ajo që po i mban ende jashtë ekipit. Gjithçka është e mbyllur, por vetëm çështje dokumentacioni presim. Ekipi po shkon drejt konsolidimit dhe jam i kënaqur me punën që po bëhet në terren për të përgatitur skuadrën. E them me bindje se skuadra po funksionon mirë. Gjithsesi, kjo nuk do të thotë se ne kemi mbyllur merkaton. Skënderbeu është gjithmonë i kujdesshëm në kërkesat e veta dhe nëse do të na paraqitet ndonjë rast, do ta vlerësojmë pozitivisht për të ndërhyrë. Merkatoja për ne është e hapur deri më 31 gusht”, ka thënë fillimisht Gjançi.
Në vijim, drejtori sportiv i Skënderbeut, i cili është marrë ekskluzivisht me merkato, u ndal edhe te largimet. Bëhet fjalë për lojtarë që janë testuar së fundmi nga trajneri Gvozdenoviç, por gjithashtu të tjerë, me të cilët ishte rënë fillimisht dakord.
“Alkeo Bani ka mbyllur aventurën me ne, i ardhur në provë te Skënderbeu. Nga ana tjetër mund të them se edhe mesfushorët Mario Rabiu dhe Altin Kryeziu, janë larg Skënderbeut. Në fakt ka qenë një zgjedhje e jona në rastin e parë dhe me Kryeziun nuk kemi pasur një marrëveshje konkrete. Por gjithsesi, mbetemi ende në merkato. Jemi të fokusuar te ndërtimi i një ekipi kompetitiv për të rikthyer Skënderbeun në standarde të cilat u shkojnë përshtat këtij dhe që askush nuk ka arritur t’i afrohet limiteve që ka vendosur në Europë”, përfundoi Gjançi, i cili bashkë me presidentin Takaj prej javësh po bisedojnë itensivisht me futbollistët që janë afruar gjatë merkatos së verës në Korçë.
