Është dorëzuar autori i vrasjes së 50-vjeçarit shqiptar që u qëllua mesditën e së enjtes jashtë një karburanti, në zonën e Analipsit, në lindje të Selanikut.
Autori i dyshuar u dorëzua mesditën e së premtes. Bëhet fjalë për një shtetas shqiptar 45-vjeçar, baba i tre fëmijëve , i cili është vetëdorëzuar i shoqëruar nga avokati i tij.
Sipas informacioneve, 45-vjeçari pretendon se ishte shok me viktimën dhe se mes tyre kishte pasur një sherr. Ai ka deklaruar në polici se biseda e fundit mes tyre ka qenë në lidhje me një shumë parash që autori i vrasjes i detyrohej viktimës për një shitje droge.
Sakaq, zbulohet se në automjetin e autorit ka qenë edhe një grua e implikuar në çështje, e cila dyshohet se ka pasur lidhje intime me 45-vjeçarin.
Autoritetet greke kanë bërë të ditur se 45-vjeçari pohoi krimin dhe dëshmoi rrethanat e ngjarjes.
