Deputeti demokrat Tritan Shehu ka komentuar zhvillimet më të fundit në vendin tonë.
Fillimisht Shehu u ndal të fliste rreth sistemit të drejtësisë dhe faktit se si shumë funksionarë të lartë janë përshirë së fundmi në skandale politike dhe afera korruptive.
“Mendoj ajo që po ndodh në Shqipëri janë shumë të paktë, ata që po dënohen. Mua më vjen keq për çdo njeri që dënohet dhe shpreh keqardhjen time por ama duke pas dimensionet e lidhjes së institucioneve me krimin në vendin tonë, si dhe kontributet e për kthimin e vendit në ‘Republikën e Drogës’ dhe kanabisit, si dhe deformim i procesit të votimit, mes kaq shumë krimeve ato duken si mikro kundrejt të tjerave, i cili është jashtë nivelit të një shteti normal. Unë e shikoj edhe në anën politike, Shqipëria ka një deformim të thellë, të funksioneve e kolonat e një shteti normal që duhet të ishte dhe si i tillë që duhet të ishte ky nuk është faji i opozitës. Nuk mund të fajësosh opozitën sepse në këto 11 vite dominoi krimi, korrupsioni, deformimi i demokracisë, këto i ka bërë mazhoranca nuk mund të fajësohet opozita.”, tha Shehu.
Më tej Shehu u ndal edhe në mbledhjen e sotme të Komisionit të Ligjeve, ku në një mbledhje ‘sekrete’, pa praninë e opozitës votuan pro për pr.ligjin e kanabisit mjekësor. Këtë shehu e cilësoi si një shkeje të rëndë kushtetuese dhe veprim kriminal.
“Është mbledh Komisioni i Ligjeve, kur dje nuk e kaloi dot në mbledhje normale, pa media, pa transparencë e pa deputetët e opozitës dhe miratoi pr.ligjin për kanabisin. Kjo është një shkelje shumë e rëndë e demokracisë dhe e parlamentarizmit. Ky pr.ligj bie ndesh me interesat e vendit, njerëzve dhe dëmton imazhin e vendit si dhe rrugën e integrimit të Shqipërisë në rrugën e integrimit të BE”, theksoi ai per Fax News.
Sakaq, Shehu argumentoi edhe pse opozita është kundër këtij pr.ligji, ku tha se i hap rrugë krimit të organizuar dhe veprimtarive të pastrimit kriminal duke forcuar marrëdhënien e bandave kriminale me shtetin.
“Ky është ligji i krijimit të ‘Republikës së Kanabisit’ në Shqipëri, i legalizimit të grupeve kriminale, i promocionit të drogës, i cili e promovon dhe shumëfishon atë. Kjo do të forcojë grupet kriminale dhe do i hapi rrugë pastrimit të parave, si një nga elementët kryesor të këtij ligji. Ky ligj bie ndesh me kodin penal, pasi nën petkun e asaj që quhet kanabisi mjekësor kemi kanabisin kriminal”, përfundoi ai.
