Ish-deputeti dhe ish-kandidati i opozitës për bashkinë e Tiranës, Belind Këlliçi ka reaguar pas zhvillimeve të reja që po prodhon mega-afera e vjedhjes me inceneratorët në vend, me urdhër-arrestin e SPAK për ish-zv.kryeministrin Arben Ahmetaj.
Në dosjen e urdhër-arrestit të SPAK për Ahmetajt, thuhet se projekti i inceneratorit të Tiranës ishte një nismë e kryebashkiakut Erion Veliaj, e cila u kundërshtua nga ministri i Financave, Arben Ahmetaj dhe se opas projektit qëndronin sërish Klodian Zoto dhe Mirel Mërtiri.
Në një postim në rrjetet sociale, teksa ka publikuar dokumentin e firmosur nga Veliaj, Këlliçi shtron pyetjet se kur SPAK do të thërresë Veliajn për firmën që ka hedhur për inceneratorin e Tiranës, që sipas tij, ka grabitur 128 milionë euro.
“Kur do thërritet Erion Veliaj në SPAK për firmën që ka hedhur për inceneratorin e Tiranës, ku i ka hapur rrugën vjedhjes së 128 milionë eurove? Kur do e nisë SPAK procesin ndaj inceneratorit të Tiranës?” shkruan Këlliçi.
