Skënderbeu asnjëherë nuk e ka humbur mundësinë e gjurmimit të talenteve.
Rritja e lojtarëve më të dhëna të mira dhe nxjerrja e tyre tregun e huaj, do të mbetet motoja kryesore e korçarëve.
Një strategji që u ka ecur, ndaj edhe të rinjtë e shohin këtë klub si “trampolinë”.
I tillë është rasti edhe i Ermir Rashicës, futbollistin që la Trepçën për t’u bërë pjesë e bardhekuqve.
Në një prononcim të dhënë për “Panorama Sport”, 19- vjeçari tregon arsyet pse zgjodhi Skënderbeun mes ofertave të tjera që kishte në merkato, dhe mbi të gjitha ambiciet për të ardhmen.
“Kam firmosur një kontratë 3-vjeçare me Skënderbeun dhe pres me padurim të filloj sezonin e ri me këtë fanellë. Ky ekip më ka ngjallur shumë emocione kur ishte në kulmin e vet edhe pse isha fëmijë atëherë. Kjo ndikoi në zgjedhjen time, por edhe projekti që më paraqiti presidenti Ardjan Takaj. Kisha oferta të ndryshme në Kroaci, por edhe në Shqipëri mes të cilave Tirana dhe Partizani, por i kam refuzuar për Skënderbeun. I refuzova, për të qenë i sinqertë, edhe për faktin se dua të kem më shumë minuta lojë nën këmbë dhe te Skënderbeu besoj se do ta kem këtë mundësi.
E kam ndjekur futbollin shqiptar dhe e njoh relativisht mirë. Tani po mendoj vetëm të përshtatem me ekipin dhe të jem mirë fizikisht për të bërë një sezon brenda pritshmërive. Natyrisht që çdo ekip mendon për më shumë dhe kalimi në një ekip të huaj të nivelit të lartë për mua mbetet ëndërr. Besoj se me Skënderbeun do ta kem një mundësi të tillë, pasi janë shumë lojtarë që kanë kaluar në nivele të larta prej këtu. Dua dhe unë të kem një fat të tillë”, theksoi mesfushori.
