Kreu i SPAK Altin Dumani, firma e së cilit është në kërkesën drejtuar Kuvendit për arrestimin e Arben Ahmetajt, është shprehur se ky i fundit ka tentuar të prishë prova dhe të intimidojë dëshmitarë.
Deklaratat që i bëri gjatë mbledhjes së Këshillit të Mandateve, i zbuloi gjatë seancës së sotme parlamentare deputeti i PD-së Gazmend Bardhi.
“Prej 1 jave deklaroi (kreu i SPAK), Arben Ahmetaj me fuqinë si depute, ish ministër, ish zëvendëskryeministër, ka tentuat të intimidojë dëshmitarë dhe të prishë prova dhe për të shmangur prishjen e provave dhe intimidimin e dëshmitarëve kërkojmë arrestimin”, u citua Dumani nga Gazment Bardhi.
Deputeti demokrat ngriti dyshime se mes Ahmetajt dhe kryeministrit Edi Rama po zhvillohen negociata.
“Këta duan t’i japin kohë që të prishë provat. Si po shkojnë negociatat me secilin prej atyre që vendos ti lëshojë në një moment të caktuar…”, tha Bardhi në Kuvend.
Pas tij, fjalën e mori deputeti i PS-së Tonin Gogu, i cili kërkoi që të mos hidhet dritë mbi deklaratat e prokurorisë gjatë dy seancave të zhvilluar në Këshillin e Mandateve me dyer të mbyllura për të ruajtur sekretin hetimor.
SPAK kërkon nga Kuvendi autorizim për arrestimin e ish-ministrit të Financave Arben Ahmetaj, të cilin e akuzon për korrupsion pasiv, fshehje pasurie dhe pastrim parash. Sipas akuzës, Ahmetaj ka përfituar qindra mijëra Euro nga Klodian Zoto dhe Mirel Mërtiri duke i favorizuar që kompanitë e tyre dhe të tjera të lidhura me të ashtuquajturit bosët e inceneratorëve të përfitojnë tre kontratat koncesionare për inceneratorët e Elbasanit, Fierit dhe Tiranës.
Pas dy seancave në Këshillin e Mandateve, palët kanë rënë dakord që të japin dritën jeshile për miratimin e kërkesës së SPAK për arrestimin e Ahmetajt. Nga deputetë të opozitës është kërkuar që të bëhej në seancën e sotme. Megjithatë mazhoranca socialiste ka vendosur që seanca për këtë çështje të zhvillohet të hënën pasdite.
Vetë Ahmetaj, siç kanë konfirmuar avokatët e tij, nuk ndodhet në Shqipëri.
