Gazmend Bardhi ka shpërthyer i revoltuar në seancën e sotme parlamentare teksa fliste për largimin e Arben Ahmetajt pak orë para se SPAK ti dërgonte Kuvendit kërkesën për arrestmin e tij.
Bardhi i drejtohet Ahmetajt duke i thënë të mos shëtisë aeroporteve me lekët që u ka vjedhur shqiptarëve, por të tregojë bashkëpunëtorët e tij.
“Ju zonja kryetare e Kuvendit, nuk keni kurajo që të pyesni kryeministrin nëse vjen apo jo në seancë. Kjo tregon që ju nuk jeni këtu si kryetare e këtij Kuvendi, por për ti bërë shërbime që i interesojnë vetëm Edi Ramën. Ju flisni këtu për procedurë, a e keni lexuar ju shkresën që ka ardhur nga prokuroria, çdo dokument e kishte bërë Klodian Zoto dhe ju flisni për procedurë.
I bëj thirrje Arben Ahmetajt të vij këtu dhe të tregojë bashkëpunëtorët e tij në qeveri, dhe të mos shëtisë nga një aeroport në një tjetër, me lekët që ju ka vjedhur shqiptarëve. Ju keni futur ligjin për kanabisin në çdo komision, dhe ska qenë asnjë urgjencë dhe në asnjë kalendar.
Çfarë urgjence ka? Secili prej jush ka një dosje, a ndjeni ju përgjegjësi që u bëtë fasada e inceneratorëve, a nuk ju vjen juve turp që u bëtë mburojë e mafiozëve. I nxorët të gjithë pa përgjegjësi, por ja që paska përgjegjës.
Kreu i SPAK tha në Këshillin e Mandateve se prej një jave Arben Ahmetaj ka intimuduar dëshmitarët dhe po tenton prishjen e provave, këtë kërkoi Altin Dumani, që të bëhet arrestimi i menjëhershëm”- tha Bardhi.
