Gjykata Kushtetuese ka rrëzuar 4 nga 5 kërkesat e deputetes Ina Zhupa sa i takon çështjes së koncensionit të Butrintit, i cili do të menaxhohet nga fondi shqiptaro amerikan.
Kushtetuesja ka rrëzuar kërkesën për pezullimin e këtij ligji, ndërkohë që të vetmen pikë që ka pranuar është ajo për marrjen e komunikimeve të UNESCO-s me qeverinë.
5 kërkesat e deputetes:
- Të gjitha komunikimet zyrtare mes shtetit shqiptar me UNESCO, që lidhen me koncesionin e Butrintit;
- Thirrja e dëshmitarëve për çështjen, ekspertë të fushës dhe njohës të Trashëgimisë Kulturore të Butrintit;
- Kërkojmë thirrjen e fondacionit shqiptaro-amerikan, kërkojmë të thirret adf, si subjekt i interesuar;
- Moslegjitimimi i fondacionit për menaxhimin e Butrintit, si i pabazuar në ligj;
- Pezullimin e vënies në zbatim të ligjit;
Sipas arsyetimit të dhënë nga anëtarët e Gjykatës Kushtetuese, komunikimet zyrtare mes qeverisë shqiptare dhe UNESCO-s janë edhe ato më të rëndësishmet që i shërbejnë procesit.
Seanca e sotme u shty, ndërkohë që një datë e re pritet të caktohet pas pushimeve verore.
Para seancës, Zhupa tha gjatë komunikimit me gazetarët se Gjykata Kushtetuese duhet të dëgjojë të gjithë dëshmitarët që janë palë në këtë proces.
“Ky është një mashtrim që i çohet UNESCO-s nga shteti shqiptar vetëm për të thënë që nuk e ka shkelur konventën e Parisit. E gënjejnë dhe përveç kësaj ata kanë një vit e gjysmë që nuk sjellin dokumente as mua dhe as Gjykatës Kushtetuese. Kërkesa jonë do të jetë detyrimi i qeverisë për të sjellë të gjithë dokumentacionet që lidhen me UNESCO-n para se të vendoset koncesioni i Butrintit në Kuvend. Nuk mund të hyjmë në një gjykim duke na fshehur të vërtetat. Është e rëndësishme që Gjykata Kushtetuese të jetë e bindur 100% në shkeljet e Kushtetutës.
Butrinti nuk është pasuria jonë por e gjithë shqiptarëve. Kjo është një betejë përtej politikës dhe na takon të gjithëve si shqiptarë. Kërkesa e dytë është në lidhje me thirrjen e dëshmitarëve për Butrintin. Gjykata duhet të dëgjojë ata që kanë qenë pjesë e vendimmarrjes. Nuk mund të bëhet një proces kushtetues pa dëgjuar atë që thotë që Butrinti është grek. Kam kërkuar të thirret ish kongresmeni amerikan që është marrë me çështjet shqiptare. Që flet për modelin amerikan”, deklaroi ajo.
