Shoqata e Himariotëve të Amerikës ka reaguar lidhur me arrestimin dhe mbajtjen në paraburgim të kryebashkiakut të zgjedhur të Himarës, Fredi Belerit.
Në një reagim zyrtar shoqata shprehet se rasti i Belerit, është një provë për shtetin ligjor dhe demokracinë funksionale në Shqipëri. Ndër të tjera në njoftim shkruhet se arrestimi i Belerit është përpjekje shqetësuese e qeverisë shqiptare për të anashkaluar rezultatin e zgjedhjeve dhe nuk janë në përputhje me një komb që aspiron anëtarësimin në Bashkimin Evropian.
Ata i bëjnë thirrje qeverisë së Shteteve të Bashkuara të monitorojë nga afër rastin.
Reagimi i Shoqatës:
Shoqata e Himariotëve të Amerikës shpreh shqetësimin e saj të thellë për vazhdimin e paraburgimit të kryebashkiakut të zgjedhur të Himarës, Fredi Beleri, në kundërshtim me standardet ligjore dhe të drejtat e njeriut të njohura botërisht dhe kërkon sërish lirimin e tij të menjëhershëm nga qeveria shqiptare. Arrestimi i z. Beleri dy ditë para zgjedhjeve dhe ndalimi i tij i vazhdueshëm, tashmë në ditën e 50-të, janë përpjekje shqetësuese të qeverisë shqiptare për të anashkaluar rezultatin e zgjedhjeve dhe nuk janë në përputhje me një komb që aspiron anëtarësimin në Bashkimin Evropian.
Së fundmi, qeveria shqiptare me mbështetjen e Shteteve të Bashkuara dhe Bashkimit Evropian ndërmori një reformë të thellë të sistemit të saj gjyqësor. Rasti i Fredi Belerit është një provë për shtetin ligjor dhe demokracinë funksionale në Shqipëri. Ne i bëjmë thirrje qeverisë së Shteteve të Bashkuara të monitorojë nga afër rastin në mënyrë që ndalimi arbitrar dhe i paligjshëm i kryetarit të zgjedhur të Himarës të ketë një zgjidhje të drejtë dhe të favorshme sa më shpejt të jetë e mundur. Shoqata e Himariotëve të Amerikës vazhdon ta mbështesë z. Beleri dhe e njeh atë si kryetar ligjshëm të Bashkisë Himarë.
