Deputeti i PD-së, Edi Paloka kërkon largimin e Edi Ramës nga posti i kryeministrit pas ngjarjes në Fushë-Krujë me protagonistë Rrajat.
Pamjet e publikuara në media që vunë në lëvizje policinë treguan se si familjarë dhe të afërm të deputetit tashmë të dorëhequr Rahman Rraja, dhunuan brutalisht dy kushërinjtë Maja. Këta të fundit kishin bërë denoncim te uniformat blu se gurorja në pronësi të një anëtari të fisit Rraja, përmes shpërthimeve, po u dëmtonte banesat.
Në postimin e tij në FB, Paloka thekson se Rama nuk ka gjetur kohën të reagojë për këtë ngjarje, por është kujtuar të njoftojë se kur vjen në Tiranë këngëtari Riki Martin për koncert.
Ai shton se nuk është komisariati i Krujës që duhet ‘shkrirë’, siç njoftoi policia në një njoftim për riorganizimin e këtij enti, po kryeministri, të cilin e quan kryekëllirë.
