Është shtyrë sërish seanca gjyqësore në GJKKO ndaj ish-ministrit të Mbrojtjes, Fatmir Mediua për çështjen Gërdeci.
Shkak është bërë një pasaktësi në 109 prokurat e paraqitura nga avokati i familjarëve, Dorjan Matlia, së bashku me vendimin e gjykatës që nuk legjetimoi Matlijan si përfaqësues të tyre në proces. Gjyqi i radhës është caktuar që të mbahet më 18 korrik.
Në një prononcim për mediat, avokati Dorjan Matlija e ka konsideruar si arsye të kotë shtyrjen e gjyqit.
Dorian Matlija: Boll ky gjykim është vonuar 15 vite, tani të shtojmë edhe disa muaj të tjerë kot. Tani thashë ok e tërheq atë kërkesë për 109 persona sepse mjafton duke përfaqësuar 6 veta, përfaqëson interesat e të gjithë të dëmtuarve të tjerë të Gërdecit. Mbrojtja do të jetë e njëjta, nuk ndryshon nga njëri individ tek tjetri, Gjithmonë diskutohet për veprimet e shtetasit Fatmir Mediu nëse ka qenë në rregull apo jo, nëse ka qenë në përputhje me ligjin. Kjo gjë nuk ndryshon nëse janë 3, 300 apo 3000 njerëz që përfaqësohen nga i njëjti avokat. Për mua është diskutim i panevojshëm dhe çfarë bëri shtyu edhe një seancë tjetër. Seancën tjetër do të vijmë me prokura të rregullta dhe ky diskutim do të mbarojë këtu.
Ka tentativa për të zvarritur procesin?
Dorian Matlija: Ky proces është karakterizuar me vonesa gjithmonë. Ky ka qenë një proces i vonuar deri më sot dhe asgjë tjetër më shumë. Sot po shohim që të paktën të fillojë të ecë dhe ne nuk duam që të bëhemi pengesë, pengesa ka pasur plot deri më sot. Ndaj dhe gjithë ky diskutim për prokurat është i panevojshëm.
Kujtojmë se ngjarja e Gërdecit është regjistruar 15 mars 2008, rreth orës 12:05, ku si pasojë e një shpërthimi të fuqishëm në një “fabrikë” për demontimin e armëve humbën jetën të paktën 26 persona, punëtorë të kësaj fabrike.
