Një sherr ka ndodhur këtë të Enjte në Fushë-Krujë, ku anëtarë të fisit Rraja janë konfliktuar dhe kanë plagosur dy persona të tjerë. I përfshirë në konflikt ishte dhe Xhelal Rraja, vëllai i deputetit të Partisë Socialiste Rrahman Rraja.
Ngjarja ndodhi pasdite e sotme, në një lokal në aksin rrugor Fushë Krujë – Thumanë.
Burime zyrtare nga policia lokale konfirmuan se gjatë konfliktit, shtetasit Xh.Rr. (Xhelal Rraja), I. Rraja dhe K.Rraja, dyshohet se kanë goditur me sende të forta dy persona të cilët si pasojë janë dëmtuar dhe ndodhen në spital, nën kujdesin e mjekëve.
Referuar raportimeve mediatike një nga dy të plagosurit – Bilbil dhe Jashar Maja, ka marrë dëmtime të rënda.
Shkak për konfliktin, sipas bluve, dyshohet të jetë një gurore në fshatin Borizanë, në pronësi të një pjestari të fisit Rraja (P.Rraja). Në njoftimin e saj, policia saktëson se pronari ka leje shfrytëzimi dhe licensë për zhvillimin e aktivitetit.
Por sipas deklaratave të personave të dëmtuar (Bilbil dhe Jashar Maja), kur ndodhin plasje në gurore, krijon shqetësime në banesat e tyre. Këtë version e kanë konfirmuar edhe banorë të tjerë të zonës pranë gurores në deklaratat për mediat.
“Shërbimet e Komisariatit të Policisë Krujë kanë shoqëruar shtetasit (Xhelal Rraja) Xh.Rr., dhe P.Rr., si dhe po punojnë për shoqërimin e shtetasve I.Rr., dhe K.Rr., të përfshirë në këtë konflikt”, thuhet më tej në njoftimin e policisë.
Grupi hetimor në bashkëpunim me Prokurorinë po punon për sqarimin e rrethanave të ngjarjes dhe në përfundim të veprimeve hetimore do të ketë një informacion të plotë, shtuan të njëjtat burime.
Anëtarët e fisit Rraja janë përmendur jo rrallë në raportimet e ngjarjeve të kronikës së zezë. Bujë bëri disa vite më parë djali i deputetit të Partisë Socialiste Rrexhep Rraja me rastin “Xhisiela”. Dy anëtarë të tjerë, Ramazan Rraja dhe Redjan Rraja ndodhen pas hekurave, të akuzuar si të përfshirë në atentatin me 1 viktimë ndaj prokurorit Arjan Ndoja, më 1 Nëntor 2019.
