Valter Bami është shoqëruar sërish në polici, pasditen e kësaj të enjteje, së bashku me 2 persona të tjerë. Të tre këta shtetas janë të dyshuar kryesorë për atentatin që ndodhi në Larushkë të Fushë-Krujës, ku mbeti i vrarë një person dhe u plagosën dy të mitur.
Kjo është hera e dytë që Valter Bami shoqërohet nga policia. Fillimisht ai u shoqërua të martën, disa orë pas ngjarjes në fjalë. Para hetuesve, Bami ka mohuar të ketë lidhje me ngjarjen. Sa i përket dy personave të tjerë, identiteti i tyre momentalisht nuk dihet.
Kujtojmë se atentiati që ndodhi më 4 korrik, kishte objektiv Gentian Bejtjan i cili kishte ardhur para dy javësh në Shqipëri. Por nga breshëria e plumbave ka humbur jetën 29-vjecari Ramazan Sino, kunat i Bejtjas, si dhe u plagosën dy fëmijët e mitur të Bejtjas, 10 dhe 13 vjeç, të cilët aktualisht ndodhen në spitalin e Traumës.
Në atentat dyshohet se morën pjesë 3 persona, të cilët lëviznin me makinë. Pasi lëshuan breshëri plumbash në drejtim të shtëpisë së Bejtjes, mjetin e dogjën rreth 6 kilometra larg. Më pas dyshohet se autorët u ndihmuan nga persona të tjerë.
Për identifikimin e tyre, të martën policia e Fushë-Krujës ushtroi kontrolle në 3 banesa, si dhe shoqëroi 3 persona që mund të kishin dijeni për ngjarjen, Durim e Valter Bamin dhe Marklen Haka.
